२४ जेठ २०८३, आइतबार
बेलायतका प्रधानमन्त्री बोरिस जोनसनका पिताले फ्रान्सेली नागरिकताका लागि निवेदन दिएको बिहीवार बताएका छन् ।
ब्रेक्जिटपछि युरोपेली संघसँगको सम्बन्ध कायम राख्न आफूले निवेदन दिन लागेको उनको भनाइ छ ।
स्ट्यान्ली जोनसन पूर्व युरोपेली सांसद हुन् । उनले सन् २०१६ मा बेलायतमा भएको जनमतसंग्रहमा युरोपेली संघमै रहनका लागि मत दिएका थिए । फ्रान्समा आफ्नो परिवारको बलियो सम्बन्ध रहेकाले फ्रान्सेली नागरिक बन्न खोजेको उनले बताए ।
‘
मैले बुझेसम्म म फ्रान्सेली हुँ । मेरी आमा फ्रान्समा जन्मेकी थिइन् । हजुरआमा पूरै फ्रान्सेली हुनुहुन्थ्यो अनि जिजुबुवा पनि फ्रान्सेली नै हुनुहुन्थ्यो । त्यसैले फ्रान्सको नागरिकता लिएर म पुर्ख्यौली थलो फर्किन लागेको हुँ । त्यसले मलाई निकै हर्षित तुल्याएको छ,’ ८० वर्षीय स्ट्यान्लीले फ्रान्सेली भाषामा बताए ।
‘म सधैंका लागि युरोपेली हुँ, त्यो पक्का हो । बेलायतीहरूलाई तिमीहरू युरोपेली हैनौ भन्न मिल्दैन । युरोपेली संघसँग सम्बन्ध राख्नु जरूरी छ,’ उनले थपे ।
स्ट्यान्लीका छोरा बोरिस जोनसन चाहिँ सन् २०१६ मा युरोपेली संघबाट बेलायत निस्कनुपर्ने अभियानका प्रमुख नेता थिए । प्रशासनतन्त्रले थिचिएको युरोपेली संघबाट बाहिरिँदा बेलायतले व्यापक समृद्धि हासिल गर्ने उनको तर्क छ ।
