रुपन्देहीको बुटवलस्थित मुख्य बजार क्षेत्रका घरधनीहरुले अटेर गरेपछि अन्तत डोजर प्रयोग गरी सडक विस्तारको काम अगाडि बढेको छ ।

राजमार्ग चौरहादेखि गोलपार्कसम्मको सडक क्षेत्राधिकार भित्र परेका घरधनीहरुले आफ्ना घरहरु भत्काउन अटेर गरेपछि सडक डिभिजन कार्यालय, बुटवलले डोजर लगाएर सडक विस्तारको काम अगाडि बढाएको हो । तीन वर्षदेखि घरधनीले अदालतमा मुद्दा दिँदा सडकको काम अगाडि बढ्न सकेको थिएन । 

यही पुस २० गते जारी गरिएको आदेशमा जिल्ला प्रशासन कार्यालय, रुपन्देहीबाट लगत संकलन गर्नका लागि सूचना प्रकाशन गरी कागजात माग गरिएको र उक्त सूचना बमोजिम पेश गरिएका कागजातहरुको सन्दर्भमा नापी कार्यालय बुटवलबाट जग्गाको पुनः नाप जाँचको समयमा सार्वजनिक सडक ऐन २०३१ अनुसार सडकको केन्द्र बिन्दुबाट दायाँबायाँ २५ र २५ मिटर कायम गरी राजमार्गको नाप नक्सा तयार पारी फिल्डबुक कायम भएपश्चात बाँकी रहेका जग्गाको निवेदकहरुले हाल साविक गराई नयाँ जग्गाधनी प्रमाणपुर्जा लिएको भन्ने देखिँदा २०७७ असार ९ गतेको आदेशलाई निरन्तरता दिनु परेन भन्ने’ उल्लेख गरिएको छ । सर्बोच्चले बाटो खुला गरेसँगै सडक विस्तारको काम अगाडि बढाउन बाटो खुला गरेसँगै सडक कार्यालयले २४ घण्टाभित्र घर खाली गर्न सूचना जारी गरेको थियो । 

आइतबार बिहान कार्यालयले डोजर लगाएर घरहरु भत्काउन सुरु गरेको हो । ३.९ किलोमिटर यो सडकक्षेत्रभित्र ३११ घरहरु भत्काउनुपर्ने अवस्थामा छन् । 

त्यसमध्ये केही घरधनीले आफै घर भत्काएका छन् । ४ लेनको यो सडक सिक्स लेनमा विस्तार गर्न लागिएको हो । ट्राफिकचोकका घरहरुबाट डोजर चलाएर भत्काउन लागिएको छ । सडक विस्तार अब नरोकिएन सडक डिजिभन कार्यालय बुटवलका प्रमुख जयलाल मरासिनीले जानकारी दिए । यो सडक पूर्व परिश्चम र सिद्धार्थ राजमार्ग दुवैमा पर्छ ।