शिव श्रेष्ठले ‘एउटा यस्तो प्रेम कहानी’ हेर्नका लागि प्रधानमन्त्री केपी ओलीलाई निम्तो दिएका छन् ।

प्रधानमन्त्रीले समय मिलाएर फिल्म हेर्न आउने आश्वासन दिएका छन् । लोकान्तरसँग बोल्दै अभिनेता श्रेष्ठले भने, ‘प्रधानमन्त्री लामो समयपछि हल खुलेकोमा खुशी हुनुहुन्छ । सम्भवतः हाम्रो फिल्म हेर्न आउनुहुन्छ भन्ने अपेक्षा गरेको छु ।’

अभिनेता शिव श्रेष्ठको चलचित्र ‘एउटा यस्तो प्रेम कहानी’ माघ १ गते देशभरका हलमा प्रदर्शन हुँदैछ । यो चलचित्रमा शिव श्रेष्ठ, प्रियंका कार्की, आयुष्मान देशराज श्रेष्ठ, वर्षा राउत, संजोग कोइराला, बसुन्धरा भुसाल, किरण केसी, मिथिला शर्मा, रेखा फागो, नरेन खड्का लगायतका कलाकारको अभिनय छ ।

शिव श्रेष्ठले प्रदर्शनका बेला भव्य प्रिमियर आयोजना समेत गर्ने तयारी गरेका छन् । सरकारले आइतवार देशभरका हल खोल्न दिने निर्णय गरेको थियो । सरकारी नियमअनुसार ५० प्रतिशत अकुपेन्सीमा मात्र फिल्म देखाउन पाइने छ । सोही कारण शिवको महंगो बजेटमा निर्माण भएको चलचित्र चल्छ वा चल्दैन, दर्शक कत्तिको आउँछन् भन्ने कुनै अनुमान लगाउन सकिएको छैन । लकडाउनपछि पहिलोपटक शिव श्रेष्ठले हलमा चलचित्र प्रदर्शन गर्न लागेका हुन् ।

सोही दिन चलचित्र ‘एक लभर’ समेत प्रदर्शन हुँदैछ । सर्ट मुभीको रूपमा चलचित्र निर्माण भए पनि यसको चौतर्फी चर्चा छ । चलचित्र भने यूटुयुबमार्फत प्रदर्शन हुनेछ ।