जनता समाजवादी पार्टी (जसपा) का संघीय परिषद् अध्यक्ष डा बाबुराम भट्टराईले अहिले प्रत्येक जिम्मेवार नागरिक आफ्नो र पार्टीको स्वार्थभन्दा माथि उठ्ने बेला आएको बताएका छन् । उनले यसैक्रममा आफूले ओलीको प्रतिगामी कदमविरुद्ध संयुक्त जनआन्दोलनका लागि अग्रसरता लिएको बताएका छन् । 

भट्टराईले मध्यरातमा ट्वीटरमार्फत संयुक्त जनआन्दोलन निर्माण गर्ने प्रयास स्वरूप पूर्वप्रम र दलका नेताहरू शेरबहादुर देउवा,माधव नेपाल,प्रचण्ड लगायत अन्य नेताहरूसँग भेटघाट गरेको स्पष्ट पारेका छन् । उनले आगामी दिनमा पनि यसलाई निरन्तरता दिने बताएका छन् । आजमात्रै भट्टराईले प्रचण्डसँग लैनचौरमा छलफल गरेका थिए । 

भट्टराईले भनेका छन्- अहिले प्रत्येक जिम्मेवार नागरिक आफ्नो र पार्टीको स्वार्थ भन्दा माथि उठ्ने वेला आएको छ। यसै क्रममा मैले ओली प्रतिगमनविरूद्ध संयुक्त जनआन्दोलन निर्माण गर्ने प्रयास स्वरूप पूर्व प्रम र दलका नेताहरू शेरबहादुर देउवा,माधव नेपाल,प्रचण्ड लगायत अन्य नेताहरूसँग भेटघाट गरेको हुॅ। गर्दैरहनेछु ।
यस्तै अर्को एक ट्वीटमा पनि उनले संयुक्त आन्दोलनमै जोड दिएका छन् । उनले लेखेका छन् -ओली प्रतिगमन विरूद्ध नेका, प्रचण्ड माधव नेकपा र जसपाका एक्लाएक्लै जनप्रदर्शन राम्रै देखिएका छन्। तर आआफ्ना ऐनामा हेरेर मक्ख नपरौं ।  आम जनताको वितृष्णा,भूराजनीतिक जटिलता र प्रतिगमनकारीको भित्रीबाहिरी सेटिंगलाई कम नआँकौं।एक्लाएक्लै खाल्डामा जाकिने कि संयुक्त संघर्षको डुंगा चड्ने ?सोचौं ।

भट्टराईले प्रधानमन्त्री ओलीको कदमको चर्को आलोचना गर्दै आएका छन् भने कुनै पनि हालतमा प्रतिनिधिसभा पुनःस्थापना हुनुपर्नेमा  जोड दिँदै आएका छन् ।