इन्डोनेसियामा दुई समलिंगी पुरुष प्रत्येकलाई ७७ पटक लट्ठीले हिर्काएर सजाय दिइएको छ । इस्लामिक कानून तोडेको अभियोगमा उनीहरूलाई सजाय दिइएको हो । 

ती दुई पुरुषलाई पाँचजनाले लट्ठी प्रहार गरेका थिए । सजाय पाउनेहरूले दयाका लागि भिक्षा माग्दै रोएका थिए । 

सजाय पाउने दुई पुरुष गत नोभेम्बर महिनामा पक्राउ परेका थिए । उनीहरूको छिमेकीले शंका गरेपछि प्रहरीले उनीहरूको डेरामा छापा मार्दा उनीहरू आपत्तिजनक स्थितिमा फेला परेका थिए । 

सजाय दिने क्रममा कोर्रा भाँचिएपछि त्यसलाई परिवर्तन गरिएको थियो । 

सजाय दिँदै गर्दा एकछिन ब्रेक लिइएको थियो र दुई पुरुषलाई पानी पिउन दिइएको थियो । 

एक पुरुषकी आमा छोरोलाई कोर्रा हानेको हेर्न नसकेर बेहोश भएकी थिइन् । 

उनीहरूलाई खासमा ८०–८० पटक लट्ठी हान्ने सजाय दिइएको थियो तर तीन महिना कारावासमा बसेकाले तीन–तीन कोर्रा घटाइएको थियो । 

त्यही दिन अन्य चारजनालाई पनि १७ देखि ४० पटकसम्म कोर्रा हानिएको थियो । उनीहरूले रक्सी पिएको वा महिलालाई भेटेको आरोप थियो ।