२३ जेठ २०८३, शनिबार
प्रधानमन्त्री केपी शर्मा ओलीले प्रतिनिधिसभा विघटन गरेसँगै नेपाल कम्युनिस्ट पार्टी (नेकपा) विभाजित बनेपछि उपाध्यक्ष वामदेव गौतमले एकता जोगाउन पहल जारी राखेका छन् । ‘पार्टी एकता राष्ट्रिय अभियान’ घोषणा गरेर एकता जोगाउन तल्लीन उनले एक गीत सार्वजनिक गरेका छन् । गीतमा उनले नेकपा किसान र मजदूरको साथी भएको भन्दै विकास र सम्बृद्धिको सारथी पनि भएको बताएका छन् ।
एकता नै बल भएको भन्दै उनले पार्टी जोगाउन सबै पक्ष आ–आफ्नो ठाउँबाट जुट्नुपर्नेमा जोड दिएका छन । हाल प्रचण्ड–नेपाल र ओली समूह कतैपनि नलागेका उनले विभाजनले कसैको पनि हित नगर्ने बताउँदै आएका छन् ।
यस्तो छ वामदेवको ‘एकता अभियान' गीत
एकता अभियान गीत
-वामदेव गौतम
उठ्छौ अव जुट्छौ हामी एकतामा लाग्नलाई ,
अभियानमा हिँड्छौँ हामी पार्टी जोगाउनलाई !!
नेकपा हो किसान र मजदूरको साथी,
नेकपा नै विकासको संवृद्धि सारथी।
नेकपा हो नेपालको शान अनि मान,
नलाग्नु न नेता कमरेड यसलाई फुटाउन ।१।
यही पार्टी हो हाम्रो देशमा परिवर्तन ल्याउने,
बहुपार्टी समाजवादको विकास गराउने ।
राष्ट्रियता स्वाभिमान गौरव जोगाउने,
संसारभरी नेपालको इज्जत बढाउने ।
।२।
एकता नै बल हाम्रो एकता नै शक्ति ,
यही शक्तिले जन्माउँछ हाम्रो राष्ट्रभक्ति ।
राष्ट प्रिय बन्छ हाम्रो नेपाल कम्युनिस्ट पार्टी ,
मिलाएर नेता सबलाई जोगाऊँ यस्तो पार्टी ।३।
