नेपाली कांग्रेसले केरुङ नाकामा आयात निर्यात सहज बनाउन चीनसँग छलफल गर्न सरकारसँग माग गरेको छ । 

आइतवार एक विज्ञप्ति जारी गर्दै काँग्रेसले सीमा नाकामा व्यवसायीहरूले दुःख पाइरहेको प्रति ध्यानाकर्षण गर्न सरकारसँग माग गरेको हो । 

उसले विज्ञप्तिमा भनेको छ, ‘चिनको वुहानबाट कोरोना भाइरसको संक्रमण फैलिए लगत्तै अन्तर्राष्ट्रिय सिमा नाकाहरुमा प्रवेशमा कडाई र आवागमन बन्द समेत गरिनु तत्कालको परिस्थितिको बाध्यता र आवश्यक कदम थियो । तर तुलनात्मक रुपले स्थिति सहज बनेको अवस्थामा पनि उत्तरी सिमाको प्रमुख ब्यापारिक नाका केरुङमा नागरिक र व्यवसायीहरुले दुःख पाइरहेको विवरण निरन्तर प्राप्त भइरहेको हुँदा नेपाली कांग्रेस यसप्रति सरकारको गम्भीर ध्यानाकर्षण गराउँदा ।’

हाल सीमा नाका आंशिक मात्रै खुला हुँदा १ हजार ५ सय भन्दा बढी कन्टेनर सीमामा अलपत्र परेका छन् । 

काँग्रेसले विज्ञप्तिमा भनेको छ, ‘०७६ माघ १५ देखि असार २७ सम्म पूर्ण रुपले बन्द भएको सामान ढुवानी त्यसपछि आंशिक खुला गरिएको तर दैनिक ५ कन्टेनरले मात्र प्रवेश पाउँदा १५ सय बढी कन्टेनर सिमामा अलपत्र स्थितिमा पर्नु दुःखद छ । यसबाट एकातर्फ नेपाली व्यवसायीहरु मर्कामा परेका छन् भने अर्कातर्फ राज्यकै राजस्व संकलनमा पनि असर पुगेको छ ।’