०१ असार २०८३, सोमबार
उड्ने कार अहिलेसम्म विज्ञानकथामा मात्र देखिएको भए पनि अब छिट्टै वास्तविक जीवनमा समेत देखिने भएको छ ।
अमेरिकाको फेडरल एभिएसन एडमिनिस्ट्रेसनले १०० माइल प्रतिघन्टाको गतिमा उड्ने कारलाई स्वीकृति दिएको हो । यो कार सडकमा गुड्ने अनि आकाशमा उड्ने दुवै गर्न सक्छ ।
टेराफुगिया ट्रान्जिसनले विभागबाट उड्ने कार सञ्चालन अनुमतिको प्रमाणपत्र प्राप्त गरेको छ ।
यो तत्कालका लागि पाइलट र विमान उडाउन सिकाउने संस्थाहरूलाई मात्र उपलब्ध गराइएको छ । अब एक वर्षमा यो सडकमा समेत राम्ररी गुड्ने गरी सञ्चालनमा आउनेछ । सडक सुरक्षा मापदण्डलाई यसले पालन गर्न बाँकी छ ।
चालकहरूले उडिरहेको कारलाई एक मिनेटभन्दा कम समयमा सडकमा गुड्न मिल्ने बनाउन सक्छन् । यो साना विमानस्थल र राजमार्गमा समेत उड्न र अवतरण गर्न सक्छ ।
टेराफुगियाले दुई सीटे हाइब्रिड कारको उत्पादन तथा सञ्चालन स्वीकृति सन् २०२२ सम्ममा पाइसक्ने आशा गरेको छ । तर यो चलाउनका लागि सवारीचालक अनुमतिपत्र र पाइलटको प्रमाणपत्र दुवै आवश्यक छ ।
