प्रतिबन्धित नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा) लाई शान्तिपूर्ण राजनीतिमा ल्याउने प्रयासस्वरूप बुधवारदेखि भइरहेको औपचारिक वार्ता दोस्रो दिन बिहीवार समेत शुरू भएको छ ।

प्रधानमन्त्रीको सरकारी निवास बालुवाटारमा गृहमन्त्री रामबहादुर थापा ‘बादल’ नेतृत्वको सरकारी वार्ता टोलीले विप्लवका प्रतिनिधिसँग वार्ता गरिरहेको छ ।

विप्लव नेकपाको तर्फबाट नेता खड्गबहादुर विश्वकर्मा ‘प्रकाण्ड’ले वार्ता टोलीको नेतृत्व गरेका छन् । बिहान ९ः२० बजेदेखि वार्ता शुरू भएको जनाइएको छ ।

सरकारी वार्ता टोलीमा प्रधानमन्त्रीका परराष्ट्र मामिला सल्लाहकार राजन भट्टराई र विप्लवको टोलीमा उदयबहादुर चलाउने ‘दिपक’ सदस्य रहेका छन् ।

बुधवार बिहान र साँझ गरी २ चरणमा वार्ता भएको थियो । वार्ता टोलीका सदस्यले सहमतिउन्मुख छलफल भइरहेको प्रतिक्रिया दिएका छन् ।