नेपाल कम्युनिस्ट पार्टी (माओवादी केन्द्र)ले नयाँ समीकरण नबन्दासम्म सरकारलाई दिएको समर्थन फिर्ता नलिने भएको छ ।

पार्टी केन्द्रीय कार्यालय पेरिसडाँडामा बुधवार बसेको माओवादी स्थायी कमिटी बैठकले प्रधानमन्त्री केपी शर्मा ओलीलाई दिएको समर्थन फिर्ता नलिने निष्कर्ष निकालेको एक स्थायी कमिटी सदस्यले लोकान्तरलाई जानकारी दिए । 

माओवादी केन्द्रले सरकारलाई दिएको समर्थन फिर्ता नगरी संसद्मा सत्तापक्षको रोमै बस्ने रणनीति अपनाएको छ । सर्वोच्च अदालतले नेकपा खारेज गर्दै माओवादी केन्द्र ब्युँताइदिएपछि बुधवार संसदमा माओवादी केन्द्र एमालेसँग अलग्गिएर बस्दैछ । 

माओवादी केन्द्रले नयाँ सरकार निर्माणका लागि नेपाली कांग्रेस र जनता समाजवादी पार्टीसँग थप छलफल गर्ने निर्णय समेत गरेको छ । बैठकमा अध्यक्ष पुष्पकमल दाहाल प्रचण्डले हिजो कांग्रेस सभापति शेरबहादुर देउवासँग भएको छलफलबारे जानकारी गराएका थिए ।  

स्थायी कमिटी सदस्य गणेश साहका अनुसार नेपाली कांग्रेसले सहकार्यका लागि सकारात्मक कुरा गरेको प्रचण्डले ब्रिफिङ गरेका थिए । बैठकमा चैत्र १ र २ गते हुने कार्यकर्ता भेलाको तयारीको विषयमा समेत छलफल भएको थियो ।