१० असार २०८३, बुधबार
अमेरिकाका राष्ट्रपति जो बाइडनले अमेरिकी सुरक्षा निकायहरूको प्रतिवेदन सार्वजनिक भएपछि रुसविरुद्ध कठोर प्रतिबन्ध लगाउने तयारी गरिरहेको बताएका छन् ।
सन् २०२० मा भएको राष्ट्रपति निर्वाचनमा रुसले बाइडनका प्रतिद्वन्द्वी डोनल्ड ट्रम्पलाई सहायता गरेको खुलासा प्रतिवेदनमा गरिएको छ ।
बुधवार एबीसी न्युज च्यानललाई दिएको अन्तर्वार्तामा बाइडनलाई जर्ज स्टेफानोपोलोसले सोधे, ‘तपाईंलाई भ्लादिमिर पुटिन हत्यारा हुन् जस्तो लाग्छ ?’
‘अँ, लाग्छ,’ बाइडनले जवाफ दिए ।
निर्वाचनमा रुसले हस्तक्षेप गरेको प्रमाण फेला परेमा अमेरिकाले कारवाही गर्न सक्ने भनी पुटिनलाई यसअघि चेतावनी दिइसकेको उनले बताए । ‘उनले यसको मूल्य चुकाउनुपर्नेछ,’ बाइडनले भने ।
‘हामीबीच लामो कुराकानी भएको थियो । उनलाई म राम्ररी चिन्छु । हस्तक्षेप भएको कुरा स्थापित भयो भने तयार रहनू भनी मैले उनलाई बताएको थिएँ ।’
मंगलवार सीआईए र डिपार्टमेन्ट अफ होमल्यान्ड सेक्युरिटी लगायत वाशिङटनका गुप्तचरी संस्थाहरूको संयुक्त प्रतिवेदन सार्वजनिक गरिएको थियो । त्यसमा रुसले अमेरिकी निर्वाचनमा बाइडनको प्रभाव न्यूनीकरण गर्न अभियान चलाएको उल्लेख छ ।
बुधवार क्रेमलिनका प्रवक्ता दिमित्री पेस्कोभले गुप्तचरी प्रतिवेदनको आलोचना गरे । ‘रुसले अघिल्ला निर्वाचनहरूमा हस्तक्षेप गरेको थिएन र प्रतिवेदनमा उल्लेख गरिएको निर्वाचनमा पनि हस्तक्षेप गरेको हैन । रुसलाई अमेरिकी राष्ट्रपति पदका उम्मेदवारहरूसँग कुनै लेनादेना छैन । यो प्रतिवेदन झूटो हो ।’
रुसमाथि नयाँ प्रतिबन्ध लगाउने बहानाका लागि यो प्रतिवेदनमा उल्लेखित आरोपहरू लगाइएको उनको तर्क छ ।
