०१ असार २०८३, सोमबार
आफूलाई राष्ट्रिय अनुसन्धानको उपअनुसन्धान निर्देशक (एसपी) भएको बताउँदै ठगी गर्ने १ जनालाई प्रहरीले पक्राउ गरेको छ ।
जिल्ला प्रहरी कार्यालयका प्रमुख प्रहरी उपरीक्षक ओमप्रसाद अधिकारीका अनुसार पक्राउ पर्नेमा धादिङको त्रिपुरा सुन्दरी घरभएका ४५ वर्षीय बुद्धिप्रसाद पन्त रहेका छन् ।
उनलाई प्रहरीले बुधवार राति पक्राउ गरेको बिहीवार दिउँसो जानकारी दिएको हो ।
उनलाई खैरहनी नगरपालिका– ८ मा रहेको होटलबाट पक्राउ गरिएको उनले जानकारी दिए । आफूलाई राष्ट्रिय अनुसन्धानको एसपी भएको बताउँदै स्थानीयसँग रकम उठाउने र विभिन्न काम गरिदिने प्रलोभनमा पारेर ठगी गर्ने गरेको उनले बताए ।
अधिकारीका अनुसार उनी यसअघि राष्ट्रिय अनुसन्धानको सूचकका रूपमा रहेर काम गरेका व्यक्ति हुन् । काम छाडेर भागेका ती व्यक्ति ठगीमा लागेको उनले जानकारी दिए ।
पक्राउ परेका पन्तलाई म्याद थप गरी अनुसन्धान शुरू गरेको छ ।
