०१ असार २०८३, सोमबार
आमाले ३ वर्षीया छोरीको हत्या गरिन् भन्दा सामान्यतया विश्वास लाग्दैन । तर भारतको पश्चिम बेङलुरुकी सुधाले छोरीको हत्या गरेकी छन् ।
घरभित्र टेलिभिजनको रिमोर्ट खोसाखोस हुँदा बुवाको पक्ष लिने भएपछि २६ वर्षीया सुधाले छोरीको हत्या गरेकी भारतीय सञ्चारमाध्यमले जनाएका छन् ।
छोरीले बुवाको पक्ष लिने भएपछि सुधा असन्तुष्ट थिइन् । सुधाले छोरीलाई एउटा निर्माणाधीन घरमा लगेर घाँटी च्यापेर हत्या गरेकी जनाइएको छ ।
हत्यापछि सुधाले छोरी हराएको सूचना प्रहरीमा दिएकी थिइन् । घरबाहिर चाटको पसलमा पैसा तिर्ने बेला छोरी हराएको जानकारी निवेदनमा दिइएको थियो ।
अर्काे दिन निर्माणाधीन घर नजिकैबाट जाँदा एक जनाले बालिकाको शव फेला परेपछि प्रहरीलाई खबर गरेका थिए । त्यसपछि प्रहरीले सुधासँग सोधपुछ गर्यो र शंकास्पद बयान दिएपछि थप अनुसन्धान गर्दा सुधाले छोरीको हत्या गरेको स्वीकारेकी छन् ।
