चीनले देशभित्रै बनाएको खोपलाई प्रवर्द्धन गर्न खोजेको भए पनि वास्तविकतालाई सामना गर्नुपरेको छ । 

गत मार्च महिनामा बेइजिङले चिनियाँ खोप लगाएका विदेशीहरूलाई चीनको प्रवेशाज्ञा सहज बनाउने नयाँ नीति ल्याएको थियो । यसले गर्दा विश्व विभिन्न खोपको खेमामा बाँडिने भनी विज्ञहरूले चेतावनी दिएका थिए । 

यसमा व्यावहारिक समस्या पनि थियो । धेरै देशमा चिनियाँ खोपलाई सरकारले मान्यता नदिएकाले लगाउन असम्भव छ । 

चिनियाँ अधिकारी तथा सरकारी सञ्चारमाध्यमले विदेशी खोपको खुलमखुला आलोचना गर्दै तिनमा जोखिम रहेको भन्ने गरेका छन् । चीनमा बनेका खोपहरूप्रति समर्थन जुटाउन उनीहरूले यसो गरेका हुन् । 
 

वाशिङटनमा रहेको चिनियाँ दूतावासले हालै एक बयान जारी गरेर अमेरिकाले मान्यता दिएको फाइजर, बायोएनटेक, मोडर्ना र जोनसन यान्ड जोनसन लगाएका मानिसले चीन जाँदा के के स्वास्थ्य परीक्षण गर्नुपर्छ भन्ने उल्लेख गरेको छ ।

चीनमा कारोबार सुचारु भएको र संक्रमणको दर घटेको अवस्थामा धेरै मानिस चीन जान खोजिरहेका छन् ।

मार्च महिनामा चीनले खोप प्रवेशाज्ञाका रूपमा अन्तर्राष्ट्रिय यात्रा स्वास्थ्य प्रमाणपत्र जारी गरेको छ । त्यो लिएपछि खोप लगाएका मानिसले थप स्वतन्त्र रूपमा यात्रा गर्न पाउनेछन् । 

अनि चीनले विदेशमा बनेका खोपहरू स्वीकृत गर्न खोज्दैछ । त्यसो हुँदा विदेशमा बस्ने चिनियाँहरू र चीन जान खोज्ने विदेशीहरूलाई प्रमाणपत्र लिन सहज हुनेछ ।