काठमाडौं, १५ जेठ– प्रधानमन्त्री पुष्पकमल दाहाल ‘प्रचण्ड’का पुत्र प्रकाश दाहालले गणतन्त्र दिवसका अवसरमा सरकारले प्रदान गर्ने सुप्रवल जनसेवाश्री पदक नलिने भएका छन् ।
गणतन्त्रको पदक वितरणमा नातावाद हावी भएको भन्दै चर्को आलोचना भइरहेका बेला प्रधानमन्त्री पुत्र प्रकाशले पदक नलिने घोषणा गरका हुन् ।
समतामूलक समाजको निर्माण, जनताको मुक्ति, आर्थिक–सामाजिक रुपान्तरण र राष्ट्रको समृद्धिका लागि जनयुद्ध, जनआन्दोलन लगायतका राजनीतिक संघर्ष र परिवर्तनमा आफ्नो प्रतक्ष्य भूमिका भएपनि पदकका लागि आफ्नो कुनै आकांक्षा नभएको प्रकाशले बताएका छन् ।
‘म आज पनि देशको परिवर्तन र समृद्धिकै आकांक्षासहित राजनीति र राष्ट्रिय अभियानमा समर्पित छु र भोलि पनि हुनेछु । गणतन्त्र दिवसका अवसरमा नेपाल सरकारले मलाई सुप्रवल जनसेवाश्री पदक दिने निर्णय गरेकोमा हार्दिक आभार व्यक्त गर्दछु । पदकका लागि मेरो कुनै आकांक्षा थिएन र छैन,’ सामाजिक सञ्जाल फेसबुकमा स्टाटस अपलोड गर्दै प्रकाश भनेका छन्, ‘ गणतन्त्रका निम्ति त्याग, बलिदान र जीवन समर्पण गर्ने योद्धाहरुको भूमिका र योगदानको सम्मान गर्नु मेरो कर्तव्य हो । त्यही कर्तव्यलाई बोध गर्दै मलाई प्रदान गरिएको पदक नलिने घोषणा गर्दछु ।’
