जनमोर्चाका एक सांसद अनुपस्थित हुँदा गण्डकीमा अविश्वासको प्रस्ताव पक्षधरलाई धर्मसंकट

सत्ता समीकरणका लागि निर्णायक मानिएको राष्ट्रिय जनमोर्चाका एक सांसद अनुपस्थित हुँदा गण्डकी प्रदेशमा मुख्यमन्त्री पृथ्वीसुब्बा गुरुङविरुद्ध पेश भएको अविश्वासको प्रस्तावको पक्षमा बहुमत पुर्‍याउन मुस्किल पर्ने देखिएको छ ।

बुधवार दिउँसो १ बजे शुरू भएको प्रदेश सभा बैठकमा जनमोर्चाका खिमविक्रम शाही उपस्थित छैनन् ।

उनी पार्टीको सम्पर्कमा नरहेको स्रोतले जनायो । 

कांग्रेस, माओवादी र जसपाले मुख्यमन्त्री गुरुङविरुद्ध अविश्वासको प्रस्ताव दर्ता गरेका थिए । सरकारलाई दिएको समर्थन फिर्ता गरेको जनमोर्चाले अविश्वासको प्रस्तावको पक्षमा मतदान गर्ने बताएको थियो ।

बुधवार प्रदेश सभा बैठकमा जनमोर्चाकी सांसद पियारी थापाले अविश्वासको प्रस्तावको पक्षमा मतदान गर्ने बताएकी थिइन् । 

सांसद शाही अनुपस्थित हुँदा बहुमत पुग्ने सम्भावना कमजोर बनेको छ । शाही २०७६ सालमा भएको उपनिर्वाचनमा बाग्लुङबाट विजयी भएका थिए । 

स्वतन्त्र सांसद दीपक मनाङे पनि बुधवारको बैठकमा उपस्थित छैनन् । अविश्वासको प्रस्तावमाथि बुधवार नै मत विभाजनको तयारी छ ।