जिल्ला सहकारी संघ खोटाङका अध्यक्ष अनिल जोशीको कोरोना संक्रमणबाट मृत्यु भएको छ ।

सहकारीकै कामको सिलसिलामा पोखरा पुगेका अध्यक्ष जोशीमा कोरोना संक्रमण देखिएपछि पोखरास्थित आम्दा अस्पतालमा उपचार गराउँदा गराउँदै बुधवार राति मृत्यु भएको हो ।

मृतक जोशीको शव पोखरास्थित नेपाली सेनाको शव व्यवस्थापन टोलीले बिहीवार नै व्यवस्थापन गर्ने तयारी गरेको जनाइएको छ । विराटनगरबाट गत चैत २९ गते पोखरा पुगेका जोशीमा वैशाख ५ गते कोरोना संक्रमण पुष्टि भएपछि वैशाख ६ गते अस्पताल भर्ना गरिएको थियो । 

चैत २५ गते दिक्तेलबाट विराटनगर हुँदै पोखरा पुगेका जोशीमा विराटनगरमै हुँदा सामान्य रुघाखोकीको संक्रमण देखिएको पारिवारिक स्रोतले जनाएको छ । पारिवारिक स्रोतका अनुसार रुघाखोकीले च्याप्दै गएपछि पोखरामा स्वाब परीक्षण गर्दा जोशीलाई कोरोना संक्रमण पुष्टि भएको हो ।

सहकारी अभियान्ता अध्यक्ष अनिलको ४४ वर्षको उमेरमै कोरोना संक्रमणबाट निधन भएपछि परिवार शोकमा डुबेको छ । २ पत्नी र १ छोराका बुवा अनिल लामो समयदेखि सहकारी संस्थामै क्रियाशील थिए ।