राष्ट्रिय सभामा एउटै उम्मेदवार बनाउनेबारे एमाले भित्र छलफल तीब्र, दोस्रो तहका नेताहरू सक्रिय

राष्ट्रिय सभाको रिक्त एक स्थानका लागि बागमती प्रदेशमा जेठ ६ गते हुने उप निर्वाचनका लागि शुक्रवार उम्मेदवारको मनोनयन हुँदैछ । बिहान १० बजेदेखि ४ बजेसम्म उम्मेदवारी मनोनयनको कार्यक्रम छ । 

नेपाली कांग्रेस, माओवादी केन्द्र र एमालेको माधव नेपाल पक्षले डा खिमलाल देवकोटालाई साझा उम्मेदवार बनाउने निर्णय गरिसकेका छन् । बागमती प्रदेशको योजना आयोगका पूर्वउपाध्यक्ष देवकोटा माधव नेपाल निकट मानिन्छन् । नेकपा एमालेले भने आधिकारिक उम्मेदवार घोषणा गर्न सकेको छैन । 


Advertisement

यसअघि गृहमन्त्री रामबहादुर थापालाई राष्ट्रिय सभाको रिक्त स्थानमा उम्मेदवार बनाउने बताएको एमालेले बिहीवार औपचारिक निर्णय गर्न सकेको थिएन । विपक्षी गठबन्धन बलियो हुँदा चुनाव हार्न सकिने भन्दै थापा स्वयम्ले उम्मेदवारी दिन अस्वीकार गरेको स्रोतको भनाइ छ । 

एमालेको तर्फबाट साझा उम्मेदवार बनाउनको लागि एमाले संस्थापन पक्ष र माधव नेपाल पक्षबीच बिहीवारदेखि तीब्र छलफल भइरहेको छ । राष्ट्रिय सभाको उम्मेदवारीमा सहमति गरेर पार्टी एकता गर्न भन्दै एमालेका दोस्रो तहका नेताहरू क्रियाशील भएका छन् । 

महासचिव ईश्वर पोखरेल र अर्थमन्त्री विष्णु पौडेलले माधव नेपाल समूहका नेताहरूसँग बिहीवार छुट्टाछुट्टै छलफल गरेका थिए । शुक्रवार प्रधानमन्त्री एवं पार्टी अध्यक्ष केपी शर्मा ओली र माधव नेपालबीच वार्ता गराउन दोस्रो तहका नेताहरूले प्रयास गरेका छन् । 

वैशाख ९ र १० गते ओली र नेपालबीच २ चरणमा छलफल भएपनि निष्कर्षमा पुग्न सकेको थिएन । पार्टीलाई २०७५ जेठ ३ गतेको अवस्थामा फर्काउनु पर्ने माधव नेपाल पक्षको शर्त छ । 

एमाले विवाद उत्कर्षमा पुगेको समयमा बिहीवार राष्ट्रपति विद्या भण्डारीले दिउँसो ओली र साँझ नेपालसँग परामर्श गरेकी थिइन् । भण्डारीले मिलेर अघि बढ्न सुझाएको एमाले स्रोतले बतायो । 

बिहीवार बसेको एमाले स्थायी कमिटी बैठकमा माधव नेपाल पक्षमाथि गरिएको कारवाही फुकुवा गर्नेबारे समेत छलफल भएको थियो ।

वैशाख २७ गते प्रधानमन्त्री केपी शर्माले प्रतिनिधि सभामा विश्वासको मत लिने तयारी गरेका छन् । त्यस अघि नै एउटा समझदारीमा पुग्नेगरी छलफल चलिरहेको एमालेका दोस्रो तहका नेताहरूले बताएका छन् । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्