काठमाडौं, १६ जेठ– प्रधानमन्त्री पुष्पकमल दाहाल ‘प्रचण्ड’ का पुत्र प्रकाश दाहाललाई यस वर्षको गणतन्त्र दिवसको अवसर पारेर विभूषण सिफारिश गरिएकोप्रति प्रमुख प्रतिपक्षी दल नेकपा एमालेका अध्यक्ष केपी शर्मा ओलीले कडा व्यङ्ग्य गरेका छन् ।
सरकारले प्रकाश दाहाललाई सुप्रबल जनसेवाश्री सम्मान प्रदान गरेपनि दाहालले सोमवारै आफ्नो धारणा सार्वजनिक गर्दै उक्त पदक नलिने बताइसकेका छन् ।
नेकपा एमालेले मंगलवार काठमाडौंको भृकुटीमण्डपमा आयोजना गरेको विजयसभालाई सम्बोधन गर्दै अध्यक्ष ओलीले सार्वजनिक पदमा बसेको व्यक्तिले छोरालाई सम्मान गर्न सिफारिश गर्दा लोकलाज मान्नुपर्ने बताए ।
‘आफ्ना गुरिल्लालाई महान् सम्मान ? प्रधानमन्त्रीज्यू, कतिवटा बिहे ग–यो भने सम्मान पाइन्छ ? के – के गर्यो भने सम्मान पाइन्छ ? सार्वजनिक पदमा बसेपछि त्यसको सम्मान गर्न सिक्नुहोस्, सार्वजनिक पदको ख्याल राख्नुस्,’ प्रचण्डप्रति कटाक्ष गर्दै ओलीले भने, ‘छोरालाई घरैमा पुल्पुल्याउनुहोस् । राज्यको सम्मान अमर्यादित ढंगले बाँड्नु भनेको विभूषणकै अपमान हो । यस्तो अपमान स्वीकार्य छैन ।’
कसैले भारतको लखनउमा पुगेर गहना लुटेर ल्याएमा लगाउन नजानेर टाउकोमा लगाउने चिज खुट्टामा र खुट्टामा लगाउने चिज टाउकोमा लगाउने गरिएको किस्सा सुनाउँदै ओलीले मानपदवीको अपमान गरिएको आरोप लगाए ।
उनले राष्ट्रको मानपदवी लुटिएको गहना नभएको बताए ।
‘के तपाईंको छोरा महान् समाजसेवी नै हुन् ? के भन्छ नेपाली जनताले ? अरू भेटिएनन् ? देशका लागि काम गरेका मान्छे भेटिएनन् ? प्रश्न गर्न पनि लाज हुन्छ,’ ओलीले थपे ।
प्रचण्डले छोरालाई महान् समाजसेवी बनाएको भन्दै ओलीले आक्रोश समेत व्यक्त गरे ।
‘यस देशमा सम्मान गर्न लायक कांग्रेस–माओवादी बाहेक कोही छैन ? सम्मानको अपमान भएको छ । सत्तारूढ दलले शरम व्यक्त गर्नुपर्ने अवस्था छ,’ उनले भने । सार्वजनिक पदमा बसेपछि लोकलाजको ख्याल गर्न पनि ओलीले प्रचण्डलाई सुझाव दिए ।
