१५ असार २०८३, सोमबार
भारतको उत्तर प्रदेशमा गंगाको किनारमा लाशहरू गाडिएको छ ।
विगत केही हप्तामा अत्यधिक मृत्यु भएकाले विभिन्न गाउँका मानिसले मृत शरीरको दाहसंस्कार समेत गर्न सकेका छैनन् ।
त्यसपछि धेरै लाशहरू गंगा किनारको बालुवामा गाडिए । गहिरो खाल्डो नबनाइकन गाडिएका लाशलाई कुकुरहरूले लुछेका छन् ।
उन्नाव र फतेहपुर जिल्लाका अधिकारीहरूले शवहरू हटाएर त्यहाँ बालुवा राखेका छन् ।
ती दुई जिल्लामा एक महिनाको अवधिमा धेरैजनालाई ज्वरो र सास फेर्न अप्ठ्यारो भएर मृत्यु भएको छ । गंगा किनारमा दाहसंस्कारका लागि बनाइएका घाटमा लामो समय लाग्ने भएपछि बक्सर घाटबाट केही पर बालुवामा मृत शरीर गाडिएको हो ।
माथिबाट अलिकति बालुवा राखेर छोपछाप गरिएका लाशका अंग कुकुरहरूले लुछेका छन् । कुकुरहरूले लुछेका अंग लिएर गाउँ गएको देखिन्छ ।
पहिलापहिला दिनको १० वटा जति लाश जलाइने गरेकोमा आजकल १५० वटा शव जलाउन परेको छ । वरपरको ठूलै क्षेत्रमा पीपीई किट र मास्कहरू थुप्रिएका छन् ।
कानपुरको बिल्हौर तहसीलको खेरेश्वर घाट नजिकको बालुवामा पनि धेरै लाश गाडिएका छन् ।
उक्त क्षेत्रका मानिसले यस विषयमा केही कुरा गर्न मानेका छैनन् । अधिकारीहरूले घटनाको जाँचबुझ गर्ने बताएका छन् ।
