प्रमुख प्रतिपक्षी दल नेपाली कांग्रेसले संविधानको रक्षा र राष्ट्रपतिको कदम असफल बनाउन सबै दलसँग छलफल गर्ने निर्णय गरेको छ । 

सभापति शेरबहादुर देउवाको निवास बूढानीलकण्ठमा शुक्रवार बसेको कांग्रेस पदाधिकारी बैठकले राष्ट्रपतिको कदम रोक्न दलहरूसँग छलफल गर्ने निर्णय गरेको हो । 

प्रधानमन्त्रीको राजीनामा अगावै संविधानको धारा ७६ को उपधारा ५ अनुसार प्रधानमन्त्रीमा दाबी गर्न राष्ट्रपति विद्यादेवी भण्डारीले आह्वान गर्नु संविधानविपरीत भएको निष्कर्ष निकालिएको सह–महामन्त्री डा. प्रकाशशरण महतले लोकान्तरलाई जानकारी दिए । 

‘संविधानको मूल मर्म र भावनामाथि प्रधानमन्त्रीले निरन्तर प्रहार गर्ने र राष्ट्रपति त्यसको साझेदारी गर्ने काम भयो, त्यसलाई रोकेर संविधानको रक्षाका लागि उपयुक्त बाटो तय गर्नका लागि अरू दलसँग तत्कालै छलफल गर्ने निर्णय भयो,’ महतले लोकान्तरसँग भने । 

त्यो उपयुक्त बाटो के भन्ने उनले खुलाएनन् । दलहरूसँग केहीबेरमा छलफल गर्ने महतले बताए । 

बैठकले वर्तमान सरकारको विकल्प खोज्न सबै विकल्प खुला राखेर दलहरूसँग छलफल गर्ने निर्णय पनि गरेको छ ।