१६ असार २०८३, मंगलबार
ग्रीसबाट लिथुनियातिर गइरहेको यात्रुवाहक विमानलाई आइतवार बेलारुसको राजधानी मिन्स्कमा आकस्मिक अवतरण गराइएको छ ।
विमानमा बम रहेको सूचना पाइएको भन्दै आकस्मिक अवतरण गरिएको हो ।
तर वास्तवमा रायनएयरको उक्त विमानमा रहेका २६ वर्षीय पत्रकार रोमन प्रोतासेभिचलाई पक्राउ गर्नका लागि विमानलाई मिन्स्कमा ओरालिएको हो ।
अन्लाइन फ्लाइट डेटाका अनुसार, विमान बेलारुसको हवाईक्षेत्रमा उडिरहेको बेलामा यसको बाटो डाइभर्ट गरेर मिन्स्क लगिएको हो ।
पत्रकार प्रोतासेभिच पोल्यान्डमा रहेको अन्लाइन न्युज सर्भिस नेक्स्टामा काम गर्थे । त्यसमा पोहोर साल बेलारुसका राष्ट्रपति लुकाशेन्कोविरुद्ध गरिएको व्यापक प्रदर्शनको भिडियो फूटेज प्रसारण गरिएको थियो । टेलिग्रम यापको मेसेन्जरमार्फत उक्त भिडियो पठाएर प्रसारण गरिएको थियो ।
प्रोतासेभिचविरुद्ध बेलारुसका अधिकारीहरूले दंगा भड्काउने प्रयास र सामाजिक घृणा फैलाउने काम गरेको आरोप लगाएका छन् । प्रोतासेभिचले आरोपको खण्डन गरेका छन् ।
बेलारुस प्रहरीले प्रोतासेभिचलाई पक्राउ गर्नुअघि उनले विमानमा सँगै रहेका यात्रुलाई काँप्दै भनेका थिए, ‘मलाई मृत्युदण्ड दिन्छन् होला ।’
दंगा भड्काएको आरोपको सजाय १५ वर्षको कारावास हुन्छ ।
प्रोतासेभिचलाई कहाँ राखिएको छ भन्ने खुलाइएको छैन ।
युरोपेली संघ तथा पश्चिमका अनेकौं मुलुकका अधिकारीहरूले पत्रकारलाई पक्राउ गरेकोमा बेलारुसी अधिकारीहरूको भर्त्सना गरेका छन् ।
