सरकारलाई दिएको समर्थनबारे निर्णय लिन सुदूरपश्चिम प्रदेश सभामा एमाले संसदीय दलको बैठक शुरू भएको छ ।

संसदीय दलको कार्यालय धनगढीमा दलको बैठक बसिरहेको छ ।

नेकपा एमाले स्थायी कमिटीको सोमवार बसेको बैठकले प्रदेश सरकारलाई दिएको समर्थन फिर्ता लिने निर्णय गरेको थियो । केन्द्रको निर्णयबारे छलफल गर्न संसदीय दलको बैठक बसिरहेको एक सांसदले जानकारी दिए । 

५२ सदस्य रहेको सुदूरपश्चिम प्रदेश सभामा नेकपा एमालेका २५ जना सांसद छन् । सभामुखबाहेक २४ जना सांसदमध्ये अधिकांश माधवकुमार नेपाल पक्षका छन् ।

माधव नेपाल पक्षले आफूहरूसँग १८ जना सांसद रहेको दाबी गरेको छ । पार्टीले मंगलवार नै संसदीय दलको बैठक बसेर निर्णय लिन निर्देशन दिए पनि मंगलवार बैठक बस्न सकेको थिएन ।

संसदीय दलका नेता प्रकाश शाह माओवादी केन्द्रको नेतृत्वमा रहेको सरकारमा आन्तरिक मामिला तथा कानूनमन्त्री छन् । संसदीय दलको नेता स्वयं सरकारलाई दिएको समर्थन फिर्ता नगर्ने पक्षमा छन् । 

बुधवारको बैठकमा २० जना सांसद उपस्थित रहेका सहभागी एक नेताले जानकारी दिए । एमालेले सरकारलाई दिएको समर्थन फिर्ताको निर्णय गरेपछि मुख्यमन्त्री त्रिलोचन भट्टले ३० दिनभित्र विश्वासको मत लिनुपर्नेछ । प्रदेश सभामा माओवादी केन्द्रका १३ सांसद छन् । 

नेकपा एमालेको समर्थनमा माओवादी संसदीय दलका नेता भट्ट २०७४ सालमा सुदूरपश्चिम सरकारको मुख्यमन्त्री बनेका थिए ।