भारतको मध्य प्रदेशमा रहेको सीताराम का पुरा नामक गाउँमा भान्जीलाई मामाले गोली हानेर मारेका छन् । 

त्यसपछि घटनालाई सामसुम पार्न बच्चीका आमाबुवालाई मामाघरका मानिसले सम्झाइबुझाइ गरे र बच्चीको शवलाई घर नजिकैको भुइँमा गाडे । 

प्रहरीले यसको खबर पाएपछि अनुसन्धान गरेको थियो । बुधवार बच्चीको शव जमीनबाट निकालिएको थियो । 

मे ७ मा रामलखन कुशवाहा नामक वृद्ध व्यक्तिको मृत्यु भयो । पिताको मृत्युपछि छोरी अट्टदेवी आफ्ना दुई सन्ताका साथ माइत आएकी थिइन् । 

२० मेमा १३ दिनको भोजन कार्यक्रम चल्दै गर्दा रामलखनका दुई छोरा बुद्धे र मोनूबीच सम्पत्तिका विषयमा विवाद भयो । 

झगडा बढ्दै जाँदा गोली चल्यो । छतमा खेलिरहेकी आठ वर्षीया रागिनीलाई गोली लाग्यो । उनी घटनास्थलमै बितिन् । 

त्यसपछि सबैले मिलेर रागिनीकी आमा अट्ट देवी र पिता मानसिंहलाई सम्झाइबुझाइ गरे । रागिनीको शव घरभन्दा आधा किलोमिटर पर भुइँमा खाल्डो खनेर गाडियो । 

त्यसपछि गाउँमा पञ्चायत बस्यो । मामाले जानीबुझी भान्जीको हत्या नगरेकाले पूरै परिवारले गंगा स्नान गर्नुपर्ने अनि ४५ दिनसम्म गाउँबाहिर बस्नुपर्ने भन्दै पञ्चायतले फैसला सुनायो । 

प्रहरीले यसको खबर पाएपछि अनुसन्धान गरेको थियो । बुधवार रागिनीको शव निकालेर पोस्टमोर्टमका लागि ग्वालियर पठाइएको छ । भारौली थानामा आरोपितहरूका विरुद्ध उजुरी दर्ता पनि गरिएको छ ।