प्रधानमन्त्री एवं नेकपा एमालेका अध्यक्ष केपी शर्मा ओलीले सर्वोच्च अदालतमा विचाराधीन मुद्दाको फैसला आउने बेलासम्म कांग्रेस सभापति शेरबहादुर देउवाको पक्षमा हस्ताक्षर कायम राख्ने माथि कारबाहीको चेतावनी दिएका छन् ।

पार्टीलाई ढाल्ने उद्देश्यमा लाग्नेहरूलाई छुट नदिइने उनले बताए । 

एमाले केन्द्रीय कमिटी बैठकलाई शनिवार बालुवाटारमा सम्बोधन गर्दै ओलीले देउवाको पक्षमा गरिएका हस्ताक्षर सोमवारसम्म फिर्ता नगर्नेहरू पार्टी कार्यकर्ता हुन नसक्ने बताएका हुन् ।

‘मुद्दाको फैसला हुँदासम्म नेकपा एमाले ढाल्ने प्रमुख प्रतिपक्षको नेतृत्वमा बैकल्पिक सरकार बनाउनेमा जजसको हस्ताक्षर रहन्छ । ती पार्टी कार्यकर्ता होइनन्,’ ओलीले भने ।

ओलीले यसो भन्दा केन्द्रीय सदस्यहरुले ताली बजाएका थिए । 

शुक्रवारको केन्द्रीय कमिटी बैठकले देउवाको पक्षमा गरिएका हस्ताक्षर सोमवार साँझ ५ बजेसम्म फिर्ता गर्न माधव नेपाल पक्षलाई अल्टिमेटम दिएको थियो ।

ओलीले माधव नेपाल पक्षलाई सहमत गराउन आज दिउँसो ३ बजेसम्म प्रयास गरेपनि त्यो सार्थक बन्न नसकेको बताए ।