अभिनेता आमिर खान र किरण रावले अलग हुने घोषणा गरेका छन् । तर, यो किन भयो ? अहिले उनीहरू कहाँ छन् ? अब के गर्छन् ? यस विषयमा आमिरका घनिष्ट साथी अमीन हाजीले केही कुरा खोलेका छन् ।

आमिर र अमीन करिब २० वर्षदेखिका साथी हुन्। ‘लगान’ र ‘मंगल पाण्डे’मा उनीहरूले सँगै काम गरेका थिए। 

आमिर र किरण अलग भएको विषयमा उनले यसो भनेका छन्ः

मलाई यो विषयमा पहिलेदेखि सामान्य जानकारी थियो । उनीहरूबीच लकडाउनका क्रममा तनाव शुरू भएको थियो । तर, अवस्था नसम्हालिएपछि उनीहरू यो निर्णयमा पुगेका हुन् । 

यही वर्षको जनवरी–फेब्रुअरीका बेला मलाई यो विषयमा थाहा भयो । तब मलाई एकदमै नरमाइलो लाग्यो। दुःख लाग्यो । जब मैले उनीहरू दुवैजनासँग कुरा गरेँ, मेरो आँसु निक्लिएको थियो । मैले उनीहरूलाई भनेको पनि थिएँ, यस्तो दिन त नदेखाऊ । तर, आज जे भएको छ, त्यही नै साँचो हो हामीले मान्नैपर्छ ।

म आमिर र किरणलाई धेरै वर्षदेखि चिन्छु । मेरो बिहेको ६ महिना पहिले उनीहरूको बिहे भएको थियो । मैले उनीहरूका साथमा निकै रमाइलो समय बिताएको छु । उनीहरूसँगै काम गरेको छु, चाहे त्यो चर्चित टक शो ‘सत्यमेव जयते’ होस् वा ‘पानी फाउन्डेसन । 

दुवै जना साँच्चै एकदमै राम्रा छन्, मेरो लागि मात्रै होइन सबका लागि । 

सबैको मनमा अर्को एउटा प्रश्न आउला कि अलग हुने निर्णयको कारण के थियो ? तर, म मान्दिनँ कि उनीहरूबीच ‘क्रियटिभ डिफ्रेन्सेज’ बढ्न लागेको थियो वा ‘मेन्टल फ्रिक्वेन्सी’ नमिल्नेजस्ता केही भएका थिए, जसकारण यति राम्रो सम्बन्धमा दरार आओस् । 

यो थाहा पाएर हैरान पनि हुन सक्नुहुन्छ कि अलग हुने घोषणा गर्ने बेला उनीहरू लद्दाखमा ‘लाल सिंह चड्ढा’को छायांकनमा व्यस्त छन् । 

किरण यो चलचित्रकी निर्माता हुन् । यदि उनीहरूबीच सम्बन्ध बिग्रेको हुन्थ्यो भने यो सम्भव हुन्थ्यो र ? बिलकुलै हुँदैनथ्यो ।

सम्बन्ध टुट्नु कसैको निजी मामला हुन्छ । मलाई लाग्छ सायद आमिरले कामको व्यस्तताका कारण परिवारका लागि समय दिन पाएका थिएनन्, जसकारण यस्तो निर्णय भएको हो । 

कुनै बेला महात्मा गान्धीका छोराको पनि सम्बन्ध राम्रो थिएन । किनकि उनका छोरा भन्थे– तपाईंको साथमा ‘फादर अफ द नेशन’ बन्नका लागि समय छ तर, आफ्नो छोराको बाबु बन्नका लागि छैन ।

अहिले विभिन्न किसिमका कुराहरू आएका छन् । कतिपयले भनेका छन् कि आमिरको जीवनमा अरू कसैको ‘इन्ट्री’ भएको छ, तर यो गलत हो । यदि यसो हुन्थ्यो भने मलाई यसबारेमा जानकारी हुन्थ्यो। किनकि म र आमिर वर्षौंका साथी हौं ।

दुवैको अलग हुने निर्णय आपसी समझदारीमा नै भएको हो । यस्तोमा कुनै एकको तर्फबाट केही पनि बोल्नु उचित हुँदैन । तर, मलाई लाग्छ जिन्दगीले सफल मान्छेहरूकै धेरै परीक्षा लिने गर्छ।