०१ असार २०८३, सोमबार
कोशी राजमार्गअन्तर्गत संखुवासभाको माम्लिङ–पिलुवा खोला सडकमा ढुंगा सहितको पहिरो खसेपछि सडक अवरुद्ध बनेको छ ।
सोमवार धर्मदेवी नगरपालिकाको छुमाङ भीरबाट पहिरो खसेपछि सडक अवरुद्ध भएको सडक डिभिजन कार्यालय तुम्लिङटारले जनाएको छ ।
१ हप्ता लामो झरीपछि गएको पहिराले सडकमा ठूल्ठूला ढुंगा सहितको माटो खसेको डिभिजन प्रमुख गौतमकुमार श्रेष्ठले बताए । सडकखण्डमा यातायातका साधन एकतर्फी खुलाउने प्रयास भइरहेको छ ।
श्रेष्ठका अनुसार ढुंगा खसेको सडकभन्दा केही तल बाक्लो गाउँ भएकाले हटाउन समस्या भइरहेको छ । पहिरो हटाउन प्रहरी र सशस्त्र प्रहरी खटाइएका छन् ।
पहिरोले खाँदबारी किमाथांका सडकअन्तर्गत मकालु गाउँपालिकाको दोभान खण्डमा पनि पहिराले सडक अवरुद्ध पारेको छ । दोभानबाट हेदांनातर्फ जाने सडकमा पहिरो खसेको हो ।
सिलिचोङ गाउँपालिका–१ सिसुवाखोलाको तेन्छोङमा पहिरोबाट १ घर पुरिएको छ । आइतवार राति अविरल वर्षासँगै आएको पहिराले घरमा क्षति पुग्नाका साथै ८० वर्षीय छत्तीसकुमार राई घाइते भएको वडाध्यक्ष अलक्षकुमार राईले जानकारी दिए ।
आइतवार राति १ बजेतिर घरमाथिबाट आएको पहिरोले घर पूर्णरूपमा क्षतिग्रस्त भएको छ । घाइतेको स्थानीय स्वास्थ्य केन्द्रमा उपचार भइरहेको छ ।
पहिरोबाट छत्तीसकुमारकी पत्नी सुखमाया राई र नातिनी भागेर बाँच्न सफल भएको वडाध्यक्ष राईले बताए । त्यस क्षेत्रमा ३ दिनदेखि लगातार वर्षा भइरहेको छ ।
