०९ असार २०८३, मंगलबार
आफ्नै पार्टीको नेतृत्वमा सरकार बनेपछि नेपाली कांग्रेस संसदीय दलको बैठक पहिलो पटक आइतवार बस्दैछ ।
नयाँ बानेश्वरस्थित संसद भवनमा दिउसो २ बजेका लागि बैठक बोलाइएको राष्ट्रिय सभाका सांसद प्रकाश पन्थले लोकान्तरलाई जानकारी दिए ।
प्रतिनिधि सभा र राष्ट्रिय सभा दुवै संसदीय दलको बैठक संयुक्त रुपमा बस्न लागेको हो ।
संसदको अधिवेशनमा पार्टीले खेल्नुपर्ने भूमिकाको विषयमा छलफल हुने पन्थले लोकान्तरलाई जानकारी दिए ।
यसैबीच, प्रधानमन्त्री एवं कांग्रेस संसदीय दलका नेता शेरबहादुर देउवाले संसदीय दलको मुख्य सचेतक नियुक्तीको तयारी गरेका छन् ।
यसअघिका मुख्य सचेतक बालकृष्ण खाँण मन्त्री बनेपछि नयाँ प्रमुख सचेतक छान्न लागिएको हो ।
प्रमुख सचेतकले संसदीय दल र सभामुखबीच समन्वय गर्ने काम गर्छ ।
कांग्रेस सचेतक पुष्पा भुसाललाई नै प्रमुख सचेतकको जिम्मा दिने तयारी रहेको कांग्रेस स्रोतले बतायो ।
कांग्रेस प्रतिपक्षमा रहेको समयमा सशक्त भूमिका खेलेको भन्दै भुसाललाई मन्त्री बनाउने पनि चर्चा छ ।
मन्त्री नबनेको खण्डमा भुसाल नै प्रमुख सचेतक बन्ने कांग्रेसका एक केन्द्रीय सदस्यले लोकान्तरलाई जानकारी दिए ।
