०९ साउन २०८३, शनिबार
भारतीय पत्रिका इन्डियन एक्सप्रेसमा छापिएको खबरअनुसार, पूर्वी लद्दाखमा रहेको डेमचोकस्थित चारडिङ नाला नजिक भारतीय भूमिमा चिनियाँहरूले टेन्ट गाडेका छन् ।
ती टेन्टमा भएका मानिस सर्वसाधारण नागरिक भएको बताइएको छ । भारतले उनीहरूले चीनतिर फर्केर जान भने पनि उनीहरू त्यहीँ बसिरहेका छन् ।
डेमचोकमा पहिले पनि भारतीय र चिनियाँ सैनिकहरूबीत आमनेसामने भइसकेको छ । सन् १९९० को दशकमा भारत चीन संयुक्त कार्यसमूहको बैठकमा डेमचोक र ट्रिग हाइट्स विवादित क्षेत्र भएको भनी सहमति बनेको थियो ।
भारत चीन सीमामा तनाव घटाउनका लागि सैन्य स्तरको वार्ता पुनः शुरू हुनेछ । कोर कमान्डर स्तरको वार्ता अगस्टको पहिलो हप्तामा गरिने सम्भावना छ ।
भारतले टकरावको सबै विन्दुमा सैनिकहरूको पूर्ण फिर्ती चाहेको छ । चीन चाहिँ सैनिकको संख्या घटाउन मात्र चाहिरहेको छ ।
चीनले पूर्वी लद्दाखमा सैनिक गतिविधि बढाइरहेको र द्रुत गतिमा सैन्य संरचना विकास गरिरहेको भारतीय रक्षा सूत्रहरूलाई उद्धृत गर्दै भारतका सञ्चामाध्यमले खबर दिएका छन् । गहिरो ठाउँमा चिनियाँ सैनिकहरूको लगभग चारवटा डिभिजन तैनाथ छन् । अक्साई चीन हुँदै जाने सडक त्यहीँ छ ।
भारतले पनि संरचनालाई स्तरोन्नति गर्ने र सैन्य शक्ति बढाउने काममा जोड दिएको छ ।
