काठमाडौं, २७ जेठ– संविधान संशोधन तथा दोस्रो चरणको निर्वाचनका विषयमा छलफल गर्न प्रधानमन्त्री शेरबहादुर देउवाले बोलाएको बैठक विना निष्कर्ष सकिएको छ ।
प्रधानमन्त्रीको कार्यालय सिंहदरवारमा बोलाइएको बैठकमा सत्तारुढ दल नेपाली कांग्रेस र नेकपा माओवादी केन्द्र तथा मधेस केन्द्रित राष्ट्रिय जनता पार्टी (राजपा)का नेताहरु सहभागी थिए ।
प्रधानमन्त्री देउवाले दोस्रो चरणको स्थानीय तह निर्वाचनपछि संविधान संशोधन गराउने भन्दै राजपा नेतालाई चुनावमा आउन आग्रह गरेका थिए । चुनावपछि संविधान संशोधनमा विपक्षी एमालेले पनि सहयोग गर्ने भन्दै प्रधानमन्त्री देउवाले राजपाका नेताहरुलाई आश्वस्त पार्न खोजेका थिए ।
तर राजपा नेताहरुले भने संविधान संशोधन नभइ आफूहरु चुनावमा सहभागी नहुने बताएका छन् । राजपाका नेताहरुले आफ्नो अडान नछाडेपछि आजको बैठक विना निष्कर्ष टुंगिएको हो ।
प्रधानमन्त्री देउवाले बोलाएको बैठकमा माओवादी अध्यक्ष प्रचण्ड, कांग्रेस वरिष्ठ नेता रामचन्द्र पौडेल, राजपा अध्यक्ष मण्डलका संयोजक महन्थ ठाकुरलगायत नेताहरुको सहभागिता थियो ।
