नेकपा एमालेका वरिष्ठ नेता माधवकुमार नेपाल पक्षका सांसदहरूले केही साताभित्र एमाले अध्यक्ष एवं पार्टी संसदीय दलका नेता केपी शर्मा ओलीलाई बहुमतबाट विस्थापन गर्ने दाबी गरेका छन् ।

नेपाली कांग्रेसका सभापति एवं वर्तमान गठबन्धन सरकारका प्रधानमन्त्री शेरबहादुर देउवालाई विश्वासको मत दिएका नेपाल समूहका २२ सांसदले संसदीय दलमा बहुमत सिर्जना गर्ने प्रयास भइरहेको बताएका छन् । 

नेपाल समूहका सांसदहरूको आज शंखमूलस्थित सहाना प्रधान स्मृति प्रतिष्ठानमा छलफल आयोजना गरिएको थियो । जसमा माधव नेपालले सबै सांसदहरूका सल्लाह सुनेका थिए । 

छलफलमा सहभागी १९ जना सांसदहरूले संसदीय दलमा बहुमत स्थापित गर्न अन्तिम प्रयास गर्नुपर्ने बताएको बैठकमा सहभागी सांसद मेटमणि चौधरीले जानकारी दिए । उनी दाङ क्षेत्र नम्बर–१ बाट संघीय प्रतिनिधि सभामा निर्वाचित सांसद हुन् । 

‘अबको १५ दिन हामी संसदीय दलमा बहुमत पुर्‍याउने प्रयासमा लाग्छौं । बहुमत पुर्‍याएर केपी ओलीलाई संसदीय दलको नेताबाट हटाउँछौं र सरकारमा पनि सहभागी हुन्छौं । सरकारमा सहभागी हुने विषयमा सबै माननीयहरूको एक मत छ, ’ उनले भने । 

बैठकमा सहभागी अर्का सांसद विरोध खतिवडाले पनि संसदीय दलमा बहुमतको प्रयासमा लाग्ने बारेमा घुमाउरो रूपमा स्वीकार गरे । तपाईंहरू बहुमत स्थापित गरेर संसदीय दलकोे नेतालाई हटाउने अन्तिम प्रयास गर्दै हुनुहुन्छ हो ? भन्ने प्रश्नमा खतिवडाले भने, ‘कुन उपगुटले आफ्नो बहुमत स्थापित गर्न चाहँदैन ? म एक्लैले बहुमत स्थापित गर्ने कुरा होइन । बहुमतमा रहने प्रयास त जहिले पनि हुन्छ ।’ 

खतिवडा पनि आजको छलफलमा सहभागी भएका थिए । उनी मकवानपुर क्षेत्र नं २ बाट संघीय प्रतिनिधि सभामा निर्वाचित सांसद हुन् । 

नेपाल पक्षकै अर्की सांसद कल्याणी खड्काले पनि संसद् विघटन अदालतले बदर गरेर कार्यान्वयन पनि भइसकेकाले सांसदहरू स्वतः संविधान, लोकतन्त्र र व्यवस्था जोगाउने पक्षमा आउने तर्क गरिन् । 

‘संसद् पुनःस्थापनालाई त सबै माननीयहरू स्वीकार्नु भएको छ । सानदार रूपमा संसद्मा आउनुभएको छ । अदालतको निर्णयलाई कार्यान्वयन गर्नु भएको छ,’ उनले भनिन्, ‘संसद् पुनःस्थापना गलत थियो भने त उहाँहरू राजीनामा दिएर हिँड्नुपर्ने हो । त्यो त कसैले गर्नुभएन । त्यसैले उहाँहरू संविधान र लोकतन्त्र जोगाउने पक्षमा आउनुहुन्छ भन्ने विश्वास लिएका छौं ।’

बैठकमा सहभागी सांसदहरूले सम्मानसहितको पार्टी एकता हुँदा त्यसलाई स्वीकार्न सकिने तर, लतारिएर भने नजाने अडान दोहोर्‍याएका थिए । ‘पार्टी अध्यक्षले संसद् विघटन गर्नु गल्ती थियो भन्ने स्वीकारेर कमजोरी सच्याउन तयार हुन्छन् भने पार्टी एकताको लागि सदैव तयार रहनुपर्ने छलफलमा सांसदहरूले बताएका थिए । 

छलफलमा सांसदहरूको कुरा सुनेपछि वरिष्ठ नेता माधव नेपालले पार्टी अध्यक्षले कमीकमजोरी सच्याउँछन् भने आफू पार्टी जहाँसुकै रहेर पनि काम गर्न तयार रहेको बताएका थिए । ‘माधव नेपाल पदको लागि लडेको होइन । अहिले पद खोज्यो भनेर पदलोलुप देखाउन खोजिएको छ । हामीले संविधान र व्यवस्था जोगाएका हौं । यो ठीक काम गरेका छौं । कमीकमजोरी सच्चिन्छन् भने जहाँ बसेर पनि पार्टीको काम गर्न तयार छु, ’ नेपाललाई उद्धृत गर्दै सांसद खड्काले भनिन् । 

तत्कालका लागि सरकारमा जाने वा नजाने भन्ने कुरा गौण भएको उनले बताइन् । ‘हामीले बाध्यात्मक अवस्थामा संविधान र व्यवस्था जोगाउने काम गरेका हौं । पदका लागि यी सबै काम गरेका होइनौं । सरकारमा जाने, नजाने भन्ने गौण कुरा हो, ’ खड्काले भनिन् ।