०६ असार २०८३, शनिबार
जिल्ला संवाददाता तथा स्ट्रीन्जरहरूलाई तीन वर्षदेखि पारिश्रमिक नदिएको भन्दै नागरिक दैनिकका जिल्ला संवाददाताहरु अनसनमा बसेका छन् । जिल्ला संवाददाताहरुले बुधवारदेखि नागरिक पत्रिकाको कार्यालय सुन्धारामा अनशन शुरु गरेका हुन् ।
जिल्ला संवाददाताको अनसनप्रति नेपाल पत्रकार महासंघले ऐक्यबद्धता जनाएको छ । बुधवार महासंघका बरिष्ठ उपाध्यक्ष रमेश विष्ट र महासचिव रोशन पुरीले पत्रकारहरुको अनसनमा ऐक्यबद्धता जनाएका छन् । बिहीवार जन्मदेव जैशी लगायतका पत्रकारले ऐक्यबद्धता जनाएका थिए ।
महासंघका महासचिव पुरीले बुधवार एक विज्ञप्ति प्रकाशित गरी नागरिक दैनिकमा कार्यरत झण्डै ३ दर्जन जिल्ला सम्वाददाता तथा स्ट्रीन्जरहरूलाई व्यवस्थापन पक्षबाट झण्डै ३ वर्षदेखिको पारिश्रमिक उपलब्ध नगराएकोप्रति नेपाल पत्रकार महासंघको गम्भीर ध्यानाकर्षण भएको जनाएका छन् ।
‘एउटा प्रतिष्ठित मिडिया हाउसबाट लामो समयदेखि पत्रकारहरूलाई काम लगाएर पारिश्रमिक उपलब्ध नगराउनु दुःखद् पक्ष हुनुका साथै श्रमजीवी पत्रकार ऐन विपरीत हुने महासंघको ठहर छ ।
महासंघ श्रमजीवी पत्रकार ऐन अनुसारको सबै सेवा–सुविधासहित अनसनरत पत्रकारहरूको बाँकी पारिश्रमिक तत्काल उपलब्ध गराउन पत्रिका व्यवस्थापन पक्षसँग माग गर्दछ । अन्यथा महासंघ यसविरुद्ध दबाबमूलक संघर्षका कार्यक्रममा उत्रन बाध्य हुने चेतावनी दिन चाहन्छ’ पुरीले विज्ञप्तिमा भनेका छन् ।
