अमेरिकाले तिब्बतको बहानामा चीनको आन्तरिक मामिलामा हस्तक्षेप गर्न नहुने भारतस्थित चिनियाँ दूतावासका एक प्रवक्ताले बुधवार बताएका छन् । 

मंगलवार नयाँ दिल्लीमा अमेरिकाका शर्ज दफेयर्स अतुल कश्यपले दलाई लामाका एक प्रतिनिधिलाई भेटेपछि यो कुरा गरेका हुन् । 

न्गोदुप दोङचुङलाई भेटेपछि कश्यपले अमेरिका धार्मिक स्वतन्त्रतालाई समर्थन तथा तिब्बती जनताको सांस्कृतिक तथा भाषिक पहिचानको जगेर्ना गर्न प्रतिबद्ध रहेको बताए । सबै मानिसको समान अधिकारका विषयमा दलाई लामाले राखेको भिजनलाई पनि अमेरिकाले सम्मान गर्ने उनको भनाइ छ । 

एकपछि अर्को ट्वीट गर्दै चिनियाँ दूतावासका प्रवक्ता वाङ स्याओच्यानले तिब्बत चीनको आन्तरिक मामिला भएको भन्दै अमेरिकाको आलोचना गरे । 

कश्यपले दोङचुङलाई भेटेको लगभग दुई हप्ताअघि अमेरिकाका परराष्ट्मन्त्री एन्टोनी ब्लिन्केनले पनि दोङचुङसँग भेटघाट गरेका थिए ।