नेपाल तेक्वान्दो संघद्वारा टोकियो पारालम्पिकमा सहभागी हुने नेपाली पारा तेक्वान्दो टीमलाई बुधवार शुभकामनासहित बिदाइ गरिएको छ ।

टोकियो २०२० पारा ओलम्पिक अन्तर्गत भदौ १७–१९ गतेसम्म हुने पारा तेक्वान्दो खेलमा खेलाडी पलेशा गोवर्धन र प्रशिक्षकमा कविराज नेगी लामाले सहभागिता जनाउने छन् ।

बुधवार संघको सातदोबाटोस्थित केन्द्रीय कार्यालयमा आयोजित एक विशेष समारोहमा नेपाली टोलीलाई बिदाइ गरिएको छ । 

संघका अध्यक्ष प्रकाशशम्शेर राणाको सभापत्विमा आयोजित समारोहमा महासचिव दीपराज गुरुङले स्वागत मन्तव्यसहित शुभकामना व्यक्त गर्दै पलेशाको सहभागिताबारे प्रकाश पारेका थिए भने अध्यक्ष प्रकाशशम्शेर राणाले खेलाडी र प्रशिक्षकलाई फूलको गुच्छा र खादाद्वारा बिदाई गर्दै सफलताको लागि शुभकामना व्यक्त गरे ।

बिदाइका अवसरमा ललितपुर धापाखेलस्थित नागदह तेक्वान्दो डोजाङका पदाधिकारी र प्रशिक्षकले पलेशाको सफलताको कामनासहित प्रोत्साहन स्वरूप नगद २५ हजार रुपैयाँ प्रदान गरेका थिए ।