०९ साउन २०८३, शनिबार
भारतीय जनता पार्टी (भाजपा)का विदेश विभाग प्रमुख डा. विजय चौथाइवालेले नवगठित नेकपा (एकीकृत समाजवादी) पार्टीका अध्यक्ष माधव नेपालसँग भेटवार्ता गरेका छन् ।
माधव नेपालको पार्टीले औपचारिकता पाएकै दिन बिहीवार साँझ चौथाइवालेले नेता नेपालसँग भेटवार्ता गरेका हुन् ।
‘काठमाडौंमा मेरो अन्तिम भेट वरिष्ठ कम्युनिस्ट नेता र नेपालका पूर्व प्रधानमन्त्री माधव नेपालजीसँग साँझ भएको थियो । द्विपक्षीय सम्बन्धलाई अगाडि बढाउने विषयमा फलदायी छलफल भयो,’ चौथाइवालेले ट्वीटरमा लेखेका छन् ।
आइतवार काठमाडौं आएका चौथाइवालेले प्रधानमन्त्री एवं कांग्रेस सभापति शेरबहादुर देउवासँग भेटवार्ता गरेका थिए ।
सोमवार एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्ड तथा विभिन्न दलका दोस्रो तहका नेता र मन्त्रीहरूसँग भेटवार्ता गरेका थिए ।
नेपालमा भएको राजनीतिक परिवर्तनपछि नेपाल भ्रमण गर्ने चौथाइवाले भारतका वरिष्ठ राजनीतिज्ञ हुन् ।
