०५ साउन २०८३, मंगलबार
सिन्धुपाल्चोक जिल्लामा नेकपा (एकीकृत समाजवादी)ले १०३ सदस्यीय जिल्ला कमिटी गठन गरेको छ ।
नेकपा एमालेबाट छुट्टिएर बनेको नेकपा (एस)ले आज सोम सापकोटाको संयोजकत्वमा जिल्ला कमिटी गठन गरेर घोषणा गरेको हो ।
जिल्ला कमिटीको संख्या १५१ सदस्य पुर्याउने नवगठित जिल्ला कमिटीले जारी गरेको विज्ञप्तिमा उल्लेख छ ।
जिल्ला कमिटीको सहसंयोजकमा इन्द्रमाया गुरूङलाई तोकिएको छ ।
उक्त कमिटीको संयोजन समितिमा भगवती नेपाल, सोम सापकोटा, गम्भीरलाल श्रेष्ठ, सिंहबहादुर विक र नवराज पौडेल रहेका छन् । त्यसै गरी यमबहादुर महतलाई सल्लाहकार बनाइएको छ ।
भगवती नेपाल मेलम्ची नगरपालिकाको उपमेयर हुन् भने सिंहबहादुर विक राष्ट्रिय सभा सदस्य हुन् ।
माधव नेपाल समूह नेकपा एमालेमा रहँदा सिन्धुपाल्चोक नेपालको बलियो पकड भएको जिल्ला मानिन्थ्यो । तर, एमाले विभाजन भएपछि केन्द्र र प्रदेशका सांसद एवं जनप्रतिनिधिहरूले समेत एमालेमै रहने बताएपछि सिन्धुपाल्चोकमा माधव नेपालको उपस्थिति कमजोर बनेको छ ।
एमालेमा रहँदा माधव नेपाल खेमामा रहेका एमाले पोलिटब्यूरो सदस्य एवं बागमती प्रदेशका सांसद अरूण नेपालले विभाजनमा साथ नदिएर एमालेमै रहने भएपछि सिन्धुपाल्चोकमा नेकपा (एस)को शक्ति कमजोर बनेको थियो ।
