१७ असार २०८३, बुधबार
अफगानिस्तानमा तालिबानले पूर्व सैनिक तथा सरकारी कर्मचारीहरूविरुद्ध प्रतिशोधात्मक आक्रमण गरिरहेको संयुक्त राष्ट्रसंघले बताएको छ ।
एउटा भिडियोमा तालिबान लडाकूहरूले युवकहरूलाई कारको डिकीमा कोचिरहेको देखिएको छ ।
सोमवार राष्ट्रसंघको मानवअधिकार परिषदमा बोल्दै मिशेल ब्याचेलेटले तालिबान लडाकूहरू घरघर गएर पूर्व सरकार वा अमेरिकालाई सहायता गर्ने मानिसहरूलाई खोजिरहेको विश्वसनीय जानकारी आफूले पाएको बताइन् ।
‘पहिलेको प्रशासनमा काम गर्ने अधिकारी तथा तिनका परिवारका सदस्यलाई स्वेच्छाचारी थुनामा राखिएको छ,’ उनले बताइन् । ‘कुनै बेलामा अधिकारीलाई छोडिएको छ भने अरू बेलामा उनीहरूलाई मारिएको पनि छ ।’
एउटा भिडियोमा काबुलको सालाङ वात भन्ने ठाउँमा पंजशिरीहरूलाई तालिबान लडाकूहरूले कारको डिकीमा कोचेको देखिएको छ ।
पंजशिरमा ताजिक समुदायका मानिसले तालिबानको प्रतिकार गरेका थिए । काबुलमा रहेका पंजशिरीलाई त्यसैकारण तालिबानले सजाय दिनका लागि बन्दी बनाएको हुनसक्छ ।
ब्याचेलेटका अनुसार, विभिन्न व्यक्तिमाथि आक्रमण र धाकधम्की बढिरहेको राष्ट्रसंघका कर्मचारीहरूले बताएका छन् ।
