३१ जेठ २०८३, आइतबार
प्रेस काउन्सिल नेपालले अनधिकृत तवरले सञ्चालनमा आएका न्युजपोर्टलहरूलाई दर्ता प्रक्रियामा आउन आग्रह गरेको छ ।
सोमवार एक विज्ञप्ति जारी गर्दै काउन्सिलले दर्ता विना सञ्चालित न्युजपोर्टल र युट्युब च्यानलहरूलाई कानूनी दायरामा ल्याउन सञ्चालकहरूलाई आग्रह गरेको हो ।
प्रेस काउन्सिलले गत जेठको दोस्रो साता यता ७८ वटा न्युजपोर्टललाई दर्ता प्रक्रियामा ल्याउन पत्राचार गरेको जनाएको छ ।
अनधिकृत रुपमा सञ्चालित ती न्युजपोर्टललाई कानूनी दायरामा ल्याउन र पत्रकार आचारसंहिताको पूर्ण पालना गराउनका लागि सचेत समेत गराएको छ । तीमध्ये ९ वटा न्युजपोर्टलले कानूनी प्रक्रिया पूरा गरिसकेका छन् भने आचारसंहिता पालना गर्ने लिखित सम्झौता पश्चात काउन्सिलमा सूचीकृतसमेत भएको काउन्सिलले जनाएको छ ।
काउन्सिलका प्रवक्ता दीपक खनालले जारी गरेको विज्ञप्तिमा आर्थिक वर्ष २०७८/०७९ को पहिलो ३ महिनामा ६८ वटा उजुरी दर्ता भएको उल्लेख छ । यसमा साउन र भदौ महिनामा २९/२९ र असोजमा १० वटा उजुरी परेको देखिन्छ ।
प्रदेशगतरुपमा अध्ययन गर्दा यस्तो उजुरी बागमती प्रदेशबाट ५४, गण्डकी प्रदेशबाट ४, लुम्बिनी र प्रदेश १ बाट ३/३, प्रदेश २ र सुदूरपश्चिम प्रदेशबाट २/२ तथा कर्णालीप्रदेशबाट एउटा परेको छ ।
यस्ता उजुरीमध्ये अनलाइन मिडियाविरुद्ध ५२, छापामाध्यमविरुद्ध ८, टीभीविरुद्ध ३, अनलाइन टीभीविरुद्ध १, युट्युब मिडियाविरुद्ध ३ र अन्य एक रहेका छन् । विगत ३ महिनामा रेडियोविरुद्ध भने कुनै उजुरी परेको देखिँदैन । यसमध्ये २९ वटा उजुरी फछ्र्यौट भएको छ भने कारवाहीका विभिन्न प्रक्रिया पूरा गर्नुपर्ने हुँदा बाँकी (३९) उजुरी फछ्र्यौटको प्रक्रियामा रहेको काउन्सिलले जनाएको छ ।
