थापाथलीस्थित प्रसुती गृहको सुत्केरी कक्षमा आइतवार पुग्दा अन्दाजी २०/२२ वर्षकी एक महिला श्रीमानको सहारामा विस्तारै शौचालयतर्फ जाँदै थिइन् ।

बेडमा अर्की एक महिलाले दुई दिनअघि जन्मिएकी नवजात शिशुलाई स्याहारसुसार गरिरहेकी थिइन् । उनी ती बालिकाकी फुपू रहिछन् ।

'यिनी मेरी भदैनी हुन्, टीकाको दिन जन्मिएकी,' ती महिलाले भनिन् ।

घर खोटाङ र गौशालामा डेरा गरेर बस्दै आएको उनले सुनाइन् । टीकाकै दिन भदैनी जन्मिँदा उनी निकै खुशी छिन् ।

'भदैनी टीकाको साइतमै जन्मिँदा आनन्द लागेको छ । दुई दिन अगाडिदेखि अस्पताल आएका थियौं । पहिला त नर्मल डेलिभरी हुने सोचेका थियौं, तर बच्चाले पेटभित्र आची गरेको भनी डाक्टरहरूले भने अनि एक्कासि सिजर गर्नुपर्‍यो ।'

आमा र बच्चा दुवैको स्वास्थ्य राम्रो रहेको भन्दै उनले खुशी प्रकट गरिन् ।

नवजात शिशुका बुवा नितेश राईले बच्चाले पेटभित्र आची गर्‍यो भनेर डाक्टरले भनेपछि निकै डर लागेको, तर अपरेशन सफल भएर छोरीलाई पहिलोपटक देख्दा निकै आनन्द लागेको सुनाए ।

'अप्रेसन सफल भएर छोरीलाई पहिलोचोटि देख्दा सबै डर भाग्यो र आनन्द आयो,' उनले भने ।

सँगै रहेकी दिदीले थपिन्, 'पहिलो फोन आमालाई गरें । टीका लगाउँदै हुनुहुँदोरहेछ ।'

डिस्चार्ज भएपछि केही दिन काठमाडौं बसेर गाउँ जाने योजनामा उनीहरू छन् ।

****

धादिङका राजकुमार घर्ती पनि टीकाकै दिन बुवा बने ।

थापाथलीस्थित परोपकार प्रसुती गृहमा टीकाको दिन उनको छोराको जन्म भयो ।

डाक्टरले क्रिटिकल अवस्था छ भनेपछि डराएका उनले छोराको अनुहार देख्दा निकै आनन्द महशुस भएको सुनाए ।

'छोराको अनुहार देखेपछि मेरो सबै डर चिन्ता हरायो । उसको अनुहार हेरेरै बसेँ । अनि फोटो खिचेर सामाजिक सञ्जालमा पनि राखें,' उनले भने, 'त्यसपछि साथीभाइ, इष्टमित्र सबैको फोन आउन थाल्यो । बधाईको ओइरो लाग्यो । टीकाकै दिन छोरो जन्मिएकोमा निकै खुशी लागेको छ ।'

****

सँगैको बेडमा रहेकी अर्की एक महिलाले पनि आफ्नो छोरा टीकाकै दिन जन्मिएको सुनाइन् ।

'टीकाकै दिन छोरो जन्मिँदा निकै खुशी लागेको छ । यो मेरो दोस्रो सन्तान हो,' उनले थपिन्, 'आमाको माया नै पाइनँ, सानैमा बित्नुभयो । अब यही दुई सन्तानलाई आमाको माया दिएर हुर्काउँछु ।'

सिन्धुपाल्चोक घर भएकी उनले हाल काठमाडौं बस्दै आएको सुनाइन् ।

दोस्रोपटक आमा बनेकोमा खुशी भएपनि उनको शरीरमा भने अझै पीडा छ ।

'दुई-दुईपटक अपरेशन गरेकाले शरीरलाई धेरै नै गाह्रो भएको छ,' उनले सुनाइन् ।