१६ असार २०८३, मंगलबार
अमेरिकी वायुसेनाका १२ हजार कर्मचारी तथा अधिकारीले कोभिडविरुद्धको खोप लगाउन नमानेपछि कारवाही गर्ने तयारी चलिरहेको छ ।
गत अगस्ट महिनामा अमेरिकाको रक्षा मन्त्रालय पेन्टागनले सक्रिय रहेका १३ लाख सैनिकहरूलाई कोभिड खोप अनिवार्य रहेको बताएको थियो । खोप नलगाउने कर्मचारीमाथि कारवाही हुने पनि उसले बताएको थियो ।
वाशिङटन पोस्टको रिपोर्टअनुसार, वायुसेनाका १२ हजारभन्दा बढी कर्मचारीले कोरोना खोप लगाउन मानेनन् ।
सेप्टेम्बर महिनासम्म वायुसेनाका ९४ प्रतिशत मानिसले खोप लगाएका थिए तर हालैका सातामा खोप कार्यक्रम सुस्त बनेको थियो । पेन्टागनका प्रवक्ता जोन कर्बीका अनुसार, धार्मिक आधारमा खोप नलगाउने कर्मचारीको संख्या कम छ । उनीहरूलाई खोपको डोज लिनका लागि प्रोत्साहित गरिँदैछ ।
निर्धारित समयभित्र खोप नलगाउने मानिसलाई सैन्य न्याय प्रणालीअनुसार जागिरबाट बर्खास्त गरिने समेत प्रावधान छ । तर ठ्याक्कै कस्तो कारवाही गर्ने भन्ने विषयमा स्पष्ट पारिएको छैन ।
अगस्ट २५ मा अमेरिकाका रक्षामन्त्री लोयड अस्टिनले नोभेम्बर २ अघि सबै सैनिकहरूलाई कोरोनाको कम्तीमा एक डोज लगाउन सेनाप्रमुखहरूलाई आदेश दिएका थिए । सेवानिवृत्त हुन लागेका वा छुट्टीमा गएकाहरूलाई मात्र यसमा छुट दिइएको छ ।
