गत असारदेखि अवरुद्व दार्चुलाको पारिबगर खण्डेश्वरी जोड्ने सडक अवरुद्ध हुँदा बिरामीलाई उपचार गर्न समस्या भएको छ ।

अपिहिमाल गाउँपालिका–५ मकरीगाडसम्म सडक सञ्चालन हुँदा राहत पाएका बिरामी अपिहिमाल–५ तिम्लामा सडक अवरुद्व हुँदा मारमा परेका छन् । 

बिरामीलाई डोको र स्टेचरमा बोकेर अस्पताल लैजानु परेको अपिहिमाल–३ का विरा रोकायाले बताए । बिरामीलाई गोकुलेश्वर, दार्चुला सदरमुकाम खलङ्गा र धनगढी लैजान घण्टौं बोक्नुपर्ने अवस्था छ । ठेकेदारले सडक पुनर्निर्माणमा चासो नदिँदा समस्या भोग्नुपरेको छ ।

‘नजिक अस्पताल छैन, जटिलखालका बिरामीलाई अन्यत्र लैजान समस्या छ,’ रोकायाले भने ।  

खण्डेश्वरीका धीरज बोहरा लामो समयदेखि सडक पुनर्निर्माण नगर्दा बिरामीले समयमै उपचार पाउन नसकेको बताउँछन् । सडक खुलाउन ढिलाइ गर्दा स्थानीय वासिन्दालाई सास्ती भएको छ । उक्त क्षेत्रमा सुविधा सम्पन्न अस्पताल छैनन् ।

सरकारले घोषणा गरेको १० शय्याको अस्पताल निर्माण हुन सकेको छैन । अहिले स्वास्थ्य चौकीका भरमा उपचार गर्नुपरिरहेको अपिहिमाल गाउँपालिकाका स्वास्थ्य संयोजक राजेन्द्रसिंह धामीले बताए ।

सडक पुनर्निर्माण नहुँदा गाउँपालिकाले खरिद गरेको एम्बुलेन्ससमेत प्रयोगविहीन बनेको छ । सो एम्बुलेन्स मकरीगाडमै थन्किएको छ ।