नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अमेरिकी सहयोग मिलेनियम च्यालेन्ज कर्पोरेसन (एमसीसी) पास गर्ने प्रतिवद्धता जनाएर पत्र नपठाएको बताएका छन् । 

प्रधानमन्त्री शेरबहादुर देउवाले कोप २६ को सम्मेलनबाट स्वदेश फर्किने क्रममा विमानस्थलमा एमसीसी पारित गर्ने भनेर प्रचण्ड र आफूले पत्र पठाएको बताएका थिए । 

प्रचण्डलाई जोडेर प्रधानमन्त्रीको भनाइ आएपछि राजनीतिक वृत्तमा पत्र सार्वजनिक गर्नुपर्ने आवाज उठिरहेको छ ।

प्रचण्ड निवास खुमलटारमा तिहारको अवसरमा देउसीभैलो खेल्न गएका सञ्चारकर्मीहरूको टोलीलाई शुभकामना दिने क्रममा प्रचण्डले एमसीसी सम्झौताका सन्दर्भमा सबै राजनीतिक दलसँग सहमति कायम गर्न छलफल गर्नुपर्ने भएकाले समय मागिएको बताए ।

यसअघि प्रचण्डले एमसीसी सम्झौता संशोधन नगरी पास गर्न नहुने बताउँदै आएका छन् । 

‘देशमा सबैसँग छलफल नगरी, राष्ट्रिय सहमति नबनाई एमसीसी पारित गर्न सकिँदैन । त्यसको लागि हामीलाई समय पनि चाहिन्छ,’ प्रचण्डले भने, ‘हामी छलफल गर्छौं । समस्या कहाँ छ, त्यसको निदान कसरी गर्न सकिन्छ भन्ने उपाय निकाल्छौं भनेर लेखेको चिठी हो । हामी पास गर्छौं भनेर लेखेको चिठी होइन ।’

अमेरिका, बेलायत वा कुनै पनि विदेशीले दिएको सहयोग नलिने भन्ने हुँदैन भन्दै उनले भने, ‘अनुदान सहयोग दिने र लिने कुरा सामान्य कुरा हो तर एमसीसी यति धेरै बहस किन भयो भन्ने कुरामा ध्यान दिनुपर्छ ।’

देउसीभैलो टोलीसँग प्रचण्डले भने, ‘शुरूमा सहमति हुँदा एमसीसी संशोधन गर्नुपर्ने केही कुरा थिएन । अमेरिकाले पैसा दिने, नेपालले विकास गर्ने भन्ने मात्रै थियो । त्यतिबेला हामी पनि सरकारमा थियौं । देउवाकै नेतृत्वमा सरकार थियो । त्यो सम्झौतामा संसदमा लगेर ऐनसरह हुने गरी अनुमोदन गर्ने कुरा थिएन । पछि त्यो थपियो । त्यसो हुँदा के हो त यसको रहस्य भन्ने प्रश्न खडा भयो र यो विवाद बन्न आएको हो ।’ 

‘ओरिजिनल’ सहमतिसँग डराउनुपर्ने कुरा नभएको बताउँदै प्रचण्डले भने, ‘बीचमा थपिएको कुराले गर्दा नेपालको राष्ट्रिय हितमा नै असर पर्ने भन्ने आमजनतालाई लागिसकेपछि यसलाई सम्बोधन नगरी पास गर्न सकिँदैन ।’