नेकपा माओवादी केन्द्रको स्थायी कमिटी बैठकले सत्तारुढ ५ दलीय गठबन्धनको समन्वय समितिमा नेता नारायणकाजी श्रेष्ठलाई सदस्य पठाउने निर्णय गरेको छ ।

गठबन्धनभित्रका दलबाट २/२ जना सदस्य रहने समितिमा अध्यक्ष पुष्पकमल दाहाल ‘प्रचण्ड’ समेत सदस्य रहेका छन् ।

मंगलवारको स्थायी कमिटी बैठकले गठबन्धनको समन्वय समितिमा पार्टी अध्यक्ष प्रचण्ड र नेता श्रेष्ठलाई पठाउने निर्णय गरेको प्रवक्ता कृष्णबहादुर महराले जानकारी दिए ।

माओवादीले आगामी राष्ट्रिय सम्मेलन काठमाडौंमा गर्ने निर्णय समेत गरेको छ । माओवादी केन्द्रले राष्ट्रिय सम्मेलन पुस ११–१३ गतेसम्म तय गरेको छ ।

बैठकले प्रदेश इन्चार्ज र अध्यक्ष तोकेको र प्रदेश पदाधिकारीको सम्बन्धमा पार्टीका केन्द्रीय अध्यक्ष प्रचण्डको उपस्थितिमा सम्बन्धित प्रदेश भित्रका केन्द्रीय कमिटी सदस्यसँग परामर्श गरेर टुंगो लगाइने निर्णय गरिएको जनाइएको छ ।