कैलालीको लम्कीमा युवकको हत्या भएको विरोधमा दिनभर प्रदर्शनमा उत्रिएका प्रदर्शनकारीले नेपाली सेनाको गाडी तोडफोड गरेको छन् ।

तालिमका लागि जुम्लाबाट महेन्द्रनगर जाँदै गरेको सेनाको गाडीमाथि प्रदर्शनकारीले कैलालीको लम्कीमा ढुंगा प्रहार गरी तोडफोड गरेका छन् ।

प्रत्यक्षदर्शी तथा स्थानीय पत्रकार नवराज खनालले प्रदर्शनकारीले सेनाको गाडीमा ढुंगा प्रहार गरी अगाडिको सिसा फुटाएको जानकारी दिए । सेनाले गोली चलाउने आदेश समेत पाइसकेको भएपछि संयमता अपनाएको उनको भनाइ छ ।

यसैबीच प्रहरीले ४ राउन्ड अश्रुग्यास प्रहार गरेको थियो भने ३ जना प्रदर्शनकारीलाई पक्राउ परेको छ ।

मंगलवार राति खुकुरी प्रहारबाट लम्कीचुहा नगरपालिका–१ का भुपेन्द्र बडुवालको हत्या भएपछि मृतकका आफन्त तथा स्थानीयले बुधवार दिनभर राजमार्ग अवरुद्ध पार्दै प्रदर्शन गरेका छन् ।

प्रहरीले हत्यामा संलग्न सबैलाई पक्राउ गरी कारबाही गर्ने र अनुसन्धान भइरहेको बताएपछि अवरुद्ध राजमार्ग खुलाइएको बताएको थियो तर स्थानीय र आफन्तले ढुंगामुढा गरेर राजमार्ग अवरुद्ध पारेको प्रहरीले जनाएको छ ।