धनुषाको जनकपुरधाम उपमहानगरपालिका–२० देवपुरा रुपैठामा दुई पक्षबीच तनावको स्थिति सिर्जना भएपछि निषेध आदेश जारी गरिएको छ । 

जिल्ला प्रशासन कार्यालय धनुषाले पूर्वमा जलाद नदीको कलरी बाँध, पश्चिम जनकपुर जटही मार्ग दोबाटो, उत्तर हनुमाननगर रामपुर बहुअर्वा जाने बाटो र दक्षिणमा देवपुरा निमचौकदेखि बहुअर्वा जाने बाटोसम्म निषेध आदेश जारी गिरेको हो । 

साम्प्रदायिक सद्भावमा खलल पुग्ने गरी नाराजुलुस र हुलहुज्जत गरिरहेको भन्दै शान्ति सुरक्षाको अवस्थालाई मध्यनजर गर्दै निषेध आदेश जारी गरिएको प्रशासनले जनाएको छ । 

प्रशासनका अनुसार शनिवार दिउँसो २ बजेदेखि आइतवार राति १० बजेसम्मका लागि निषेध आदेश जारी गरिएको हो । 

छठका दिन हिन्दू–मुस्लिम समुदायका केही व्यक्तिबीच विवाद भएको थियो । सोही विवादका विषयमा आज पनि तनावको स्थिति सिर्जना भएको बताइएको छ ।