अर्घाखाँची (ठाडा), १० असार– दोस्रो चरणको स्थानीय तह निर्वाचनको मिति नजिकिएसँगै अर्घाखाँचीको सितगंगा नगरपालिकाका मतदातामा कौतहलता र चुनावी रौनकता एकैपटक चढेको छ । कारण हो, कांग्रेस–माओवादीले चुनावी तालमेल गर्नु र नेकपा एमाले गठवन्धनविरुद्ध एक्लै चुनावी मैदानमा उत्रिनु ।
यसअघि सितगंगामा कांग्रेस र एमालेको बराबर जस्तै अवस्था थियो । तर माओवादीसँग तालमेल गरेपछि कांग्रेसतर्फ चुलो लच्किन सक्ने स्थानीय मतदाताको आकलन छ ।
सितगंगाको मेयरका लागि नेपाली कांग्रेसबाट सूर्यप्रसाद अधिकारी उम्मेदवार छन् । गठवन्धनअनुसार माओवादीका तर्फबाट सीता रेग्मी उपमेयरकी उम्मेदवार छिन् ।
कांग्रेस र माओवादी गठवन्धनविरुद्ध नेकपा एमालेले भने बसन्त कुमार श्रेष्ठलाई मेयरको उम्मेदवार बनाएको छ । उपमेयरमा एमाले नेत्री गीता भाटले टिकट पाएकी छन् ।
कांग्रेसबाट वडा नम्बर ३ को सदस्यका उम्मेदवार रामकृष्ण श्रेष्ठ कांग्रेस–माओवादी गठवन्धनले सजिलै चुनाव जित्ने दावी गर्छन् । ‘पहिले कांग्रेस र एमालेको अवस्था बराबर जस्तै थियो,’ उनी भन्छन्, ‘तालमेल गरेपछि त्यसै पनि बलियो हुने भयो नै । हामीले सजिलै चुनाव जित्छौं ।’
कांग्रेस–माओवादी गठवन्धनले आफूलाई बलियो दावी गरिरहे पनि एमालेका उम्मेदवार भने आफूहरुले नै चुनाव जित्ने भन्दै ढुक्क छन् । एमालेबाट सितगंगा नगरपालिकाको वडानम्बर ३ को सदस्यका उम्मेदवार किरण अधिकारी कांग्रेस र माओवादीको गठवन्धनले आफ्नो पार्टीलाई कुनै फरक नपार्ने दावी गर्छन् । ‘सिद्धान्त नमिल्ने पार्टीबीचको गठवन्धन सफल हुँदैन्,’ उनी भन्छन्, ‘यहाँ चुनाव जित्ने एमालेले नै हो ।’
सितगंगाको नेतृत्वका लागि अन्य साना दल नेकपा माले, जनमोर्चा लगायतबाट पनि ७ जना उम्मेदवार छन् । तर चुनावी प्रतिस्पर्धा भने कांग्रेस–माओवादी गठवन्धन र एमालेबीच नै हुने देखिन्छ ।
विगतको गणितसितगंगा नगरपालिका विभिन्न ७ वटा गाविस मिलाएर बनेको हो । यसअघि २०५४ सालमा भएको स्थानीय निकायको चुनावमा सितगंगामा गाभिएका अधिकांश गाविसमा एमाले विजयी भएको थियो ।
२०४८ सालयता भएका निर्वाचनमा सितगंगा पर्ने निर्वाचन क्षेत्रमा एमाले तीन पटक विजयी भएको छ । यस्तै एक संसदीय चुनाव र दोस्रो संविधानसभा निर्वाचनमा नेपाली कांग्रेसका उम्मेदवार विजयी भएका थिए ।
मतदाता यसो भन्छन्सितगंगाका मतदाता तथा स्थानीय शिक्षक विष्णु अर्याल सितगंगामा चितवनको भरतपुरलाई मात दिने खालको चुनावी प्रतिस्पर्धा हुने बताउँछन् । चितवनको भरतपुर महानगरपालिकामा पनि कांग्रेस र माओवादीबीच चुनावी तालमेल भएको थियो ।
‘यहाँको चुनावमा रोचक र तीव्र प्रतिस्पर्धा हुने देखिन्छ,’ शिक्षक अर्याल भन्छन्, ‘चुनाव जित्ने दलले पनि थोरै मात्र मतअन्तरले जित्ने अवस्था छ ।’
सितगंगाको चुनावी माहोलले युवा र वयस्कहरुलाई मात्र हैन, बृद्ध बृद्धाहरुलाई पनि उत्तिकै छोएको छ । स्थानीय ७६ वर्षीय बृद्ध देवीप्रसाद अर्याल अहिलेको चुनाव रौनकपूर्ण भएको बताउँछन् । यो चुनावले सिंहदरवारको अधिकार गाउँघरमा ल्याउने भन्दै स्थानीयमा खुसीयाली छाएको उनको अनुभव छ ।
