०४ साउन २०८३, सोमबार
भारत विहारका पूर्वमुख्यमन्त्री तथा राष्ट्रिय जनता दलका सुप्रिमो लालूप्रसाद यादव आज पटनाको सीबीआई अदालतमा पेश भएका छन् ।
चारा घोटाला मुद्दामा भागलपुर र बांका कोषागारसँग जोडिएको मुद्दामा सीबीआईको विशेष अदालतले लालू यादवलाई सशरीर उपस्थिति हुने आदेश दिएको थियो ।
अब यो मुद्दाको सुनुवाइ आगामी ३० नोभेम्बरमा हुनेछ । अदालतमा पेश हुनका लागि यादव सोमवार दिल्लीदेखि पटना पुगेका थिए ।
सीबीआईको विशेष अदालतका न्यायाधीश प्रजेशकुमारसमक्ष लालूप्रसाद यादवसहित यो मुद्दासँग जोडिएका २८ आरोपी पेश भएका थिए ।
लालूप्रसादविरुद्ध चारा घोटालाको ६ वटा मुद्दा चलिरहेको छ, जसमा पाँचवटा झारखण्डको राँची विशेष सीबीआई अदालतमा र एउटा पटना सीबीआई अदालतमा सुनुवाइ चलिरहेको छ । डोरन्डा ट्रेजरीबाट १३९ करोड रूपैयाँको अवैध निकासी मुद्दाको बहस २९ नोभेम्बरमा हुनेछ ।
