२४ जेठ २०८३, आइतबार
नेकपा एमालेको केन्द्रीय निकाय अनुशासन आयोगका सदस्य अमर गिरीले महाधिवेशन सम्मुखमा पार्टी छाडेको घोषणा गरेका छन् ।
उनले आज एक विज्ञप्ति प्रकाशन गरेर एमाले परित्याग गरेको घोषणा गरेका हुन् । एमालेमा दक्षिणपन्थी, विचलन देखा परेको र त्यसलाई सच्याउने आधार समेत बाँकी नरहेकाले एमालेमा रहिरहन उपयुक्त नभएको गिरीले विज्ञप्तिमा उल्लेख गरेका छन् ।
एमालेको नवौं महाधिवेशनबाट पारित विचार, नीति, कार्यक्रम र कार्यदिशाविपरीत अध्यक्ष केपी ओलीले दक्षिणपन्थी प्रवृत्तिलाई बढावा दिएको उनले आरोप लगाएका छन् ।
गिरीले एमाले छाडेर माधव नेपाल नेतृत्वको नेकपा एकीकृत समाजवादी प्रवेश गरेको घोषणा पनि विज्ञप्तिमार्फत् गरेका छन् ।
एमाले अनुशासन आयोगमा रहेका गिरी कला, साहित्य क्षेत्रमा सक्रिय थिए ।
उनी एमालेको आसन्न महाधिवेशन प्रतिनिधि पनि हुन् । तर, महाधिवेशन उद्घाटन हुनुभन्दा दुई दिन अघि उनले पार्टी छाडेको घोषणा गरेका छन् ।
