अस्ट्रेलिया सरकारले सामाजिक सञ्जाल कम्पनीहरूलाई आपत्तिजनक कमेन्ट गर्ने अज्ञात प्रयोगकर्ताहरूको पहिचान खुलाउनका लागि बाध्य बनाउने कानून ल्याउन लागेको छ । 

त्यस्ता प्रयोगकर्ताको पहिचान सार्वजनिक गर्न नचाहने वा नसक्ने कम्पनीले मानहानिको जरिवाना रकम तिर्नुपर्नेछ । 

नयाँ कानूनले सामाजिक सञ्जाल कम्पनीहरूलाई प्रकाशक भनी परिभाषित गर्न खोजेको छ । उनीहरूको प्ल्याटफर्ममा प्रयोगकर्ताले सिर्जना गरेको सामग्रीका लागि उनीहरू जिम्मेवार हुनेछन् । 

विशेष संयन्त्र बनाएर जोकोहीले उजुरी दर्ता गर्न सक्छ । आफूलाई बेइज्जती गरिएको, सताइएको वा हैरान पारिएको भनी उजुरी गर्नेले पोस्टलाई हटाउनका लागि माग गर्न सक्छ । 

प्रधानमन्त्री स्कट मोरिसनले टेलिभिजनबाट प्रसारित प्रेस ब्रीफिङमा आइतवार बताए । 

अन्लाइन संसारमा बोट, बीगोट र ट्रोलहरूको साम्राज्य हुन नहुने उनले बताए । त्यस्ता मानिसले छद्म रूप धारण गरेर मानिसहरूलाई हानि गर्ने उनको भनाइ छ ।

कुनै प्ल्याटफर्मले आपत्तिजनक सामग्री डिलिट गर्न अस्वीकार गरेमा अदालतले अज्ञात कमेन्टकर्ताको पहिचान खुलाउनका लागि आदेश दिन सक्छ । कम्पनीले ट्रोलको पहिचान खुलाउन नमानेमा वा नसकेमा उसैलाई दोषी ठहर गरिनेछ र उसले त्यसको जरिवाना तिर्नुपर्नेछ ।