नेकपा एमाले दशौं महाधिवेशनको बन्दसत्र संचालनका लागि गठन भएको अध्यक्ष मण्डलको बैठकमा केपी ओलीले प्रस्तुत गरेको पदाधिकारी र केन्द्रीय सदस्यको सूचीमा बिवाद भएको छ । 

अध्यक्षमा उम्मेदवारी दिने बताएका भीम रावलले गोप्य कोठामा बनाइएको सूची मान्य नहुने बताएका हुन् । रावलले सूची बनाउने शैलीमै आपत्ति जनाएका उनी निकट एक नेताले जानकारी दिए । रावलले लोकतान्त्रिक विधिमार्फत नेतृत्व चयन गर्न माग गरेका छन् । 

चितवनको सौराहामा आइतवार राति १० बजे शुरु भएको बैठक सवा ११ बजेसम्म चलिरहेको छ ।

बैठकमा अध्यक्ष मण्डलका अध्यक्ष केपी शर्मा ओलीले पदाधिकारी, केन्द्रीय सदस्य र केन्द्रीय निकायका सदस्यको नाम प्रस्ताव गरेका थिए । अध्यक्ष मण्डलको बैठक चलिरहँदा केपी ओलीको पक्ष र भीम रावलको विपक्षमा नाराबाजी भएको थियो । 

अध्यक्ष मण्डलको बैठकमा ओली, युवराज ज्ञवाली, अष्टलक्ष्मी शाक्य, भीम रावल, इश्वर पोखरेल, सुवास नेम्वाङ, रामबहादुर थापा, टोपबहादुर रायमाझी, छविलाल विश्वकर्मा, लालवावु पण्डित र गोमा देवकोटा सदस्य छन् । 
अध्यक्ष मण्डलको बैठक पछि बन्दसत्र शुरु हुनेछ । बिहान १० बजेका लागि तय भएको बन्दशत्र राति सवा ११ बजेसम्म शुरू भएको छैन ।